პრემიერთან შეხვედრაზე მიღებული იქნა ძალიან მკაფიო გადაწყვეტილება, რომ თუ აქამდე მხოლოდ ინფექციური საავადმყოფო იღებდა კორონავირუსით ინფიცირებულებს, დაემატოს კიდევ სამი სახელმწიფოს დაქვემდებარებაში მყოფი კლინიკა, – ამის შესახებ ინფექციური საავადმყოფოს დირექტორმა, თენგიზ ცერცვაძემ განაცხადა.
მისი თქმით, აღნიშნული კლინიკები მზად იქნებიან პაციენტების მისაღებად საჭიროების შემთხვევაში.
„უკვე გადაწყდა, რომ პირველი რიგის მიმღებები იქნება: ინფექციური საავადმყოფო, საუნივერსიტეტო კლინიკა, რომელიც მთლიანად დაიცლება – იქ 140 საწოლია, ასევე რესპუბლიკური საავადმყოფო მთლიანად გამოთავისუფლდება და ავადმყოფების მიმღები გახდება და გორის ჰოსპიტალი, სადაც ასევე არის დაახლოებით 140 საწოლი. პლუს, ამას ემატება ბოჭორიშვილის სახელობის კლინიკა, სადაც 11 საწოლია“, – განაცხადა ცერცვაძემ.
მისი თქმით, ხვალისთვის ამ კლინიკებში ჯამში, 420 საწოლი გათავისუფლდება.