დედაქალაქის მერმა, კახა კალაძემ ახლად რეაბილიტირებულ ჭავჭავაძის გამზირზე და საავტომობილო მოძრაობის ახალ სქემაზე კიდევ ერთხელ ისაუბრა.
კახა კალაძემ იმ ადამიანებს, ვისაც ახალი სამოძრაო სქემის ამოქმედების პირველ დღეებში ჭავჭავაძის გამზირზე გადაადგილება მოუწია, ბოდიში მოუხადა.
როგორც კახა კალაძემ თბილისის მუნიციპალიტეტის მთავრობის სხდომაზე აღნიშნა, თავადაც მართავს ავტომანქანას, ყოველდღიურად გადაადგილდება ქალაქში, შესაბამისად, ყველა ადამიანის კარგად ესმის.
„მინდა დავიწყო თემით, რომელიც საკმაოდ აქტუალურია და სასიცოცხლოდ მნიშვნელოვანია სამომავლოდ თბილისისთვის და თბილისელებისთვის. მინდა დავიწყო შაბათით, როდესაც ჭავჭავაძის გამზირზე საავტომობილო მოძრაობა უკვე ახალი გადაწყობილი სისტემით დაიწყო. მინდა, ბოდიში მოვუხადო ყველა იმ ადამიანს, ავტომანქანის მძღოლს, ვინც კონკრეტულად ამ დღეს ჭავჭავაძის გამზირზე ან მის მიმდებარე ქუჩებზე გადაადგილდებოდა და მოუწია გარკვეული დროით „საცობში“ დგომა. ადამიანურად ნამდვილად მესმის თქვენი. მეც რიგითი მოქალაქე ვარ. ვმართავ ავტომობილს და ყოველდღიურად ქალაქში გადავადგილდები. თქვენს ადგილას, მეც იგივე განწყობა და დამოკიდებულება მექნებოდა. კიდევ ერთხელ გავიმეორებ, რომ მესმის თითოეული თქვენგანის და მინდა ბოდიში მოგიხადოთ. მინდა, დავიწყო ცოტა შორიდან. როდესაც ჯერ კიდევ მინისტრი ვიყავი და გუნდმა შემომთავაზა, რომ ვყოფილიყავი მერობის კანდიდატი, ჩემთვის ეს მოულოდნელი იყო, ვიყავი ენერგეტიკის მინისტრი მნიშვნელოვან პროექტებს ვახორციელებდი, არ ველოდებოდი ამ შემოთავაზებას. ამ შემოთავაზების შემდეგ ვითხოვე რამდენიმე დღე, რადგან კარგად მესმის რამდენად რთულია ამხელა ქალაქის მართვა ქვეყანაში არსებული მიგრაციის და პოლიტიკური ვნებების ფონზე“, – განაცხადა კახა კალაძემ.
მისივე თქმით, შეიძლება ვინმესთვის დედაქალაქის მერობა, ეს სტატუსი იყო გარკვეულწილად რაღაც მიმზიდველი რაღაც პრივილეგია, მაგრამ მისთვის ეს არის დიდი პასუხისმგებლობა და მსახურება.
„ეს არის მსახურება თბილისისა და თბილისელების წინაშე. მე რამდენიმე დღე ვიფიქრე ამ შემოთავაზებაზე, შევხვდი ადამიანებს, ვინც დღეს აქ არის წარმოდგენილი, ვისაუბრეთ და მივიღეთ გადაწყვეტილება, რომ აგვეღო ეს პასუხისმგებლობა. ასევე ჩვენ, როდესაც ვისაუბრეთ და ვიმსჯელეთ, ვთქვით, რომ უბრალოდ ვერ ვიქნებოდით ის ადამიანები, რომლებიც უბრალოდ გზას დააგებდა და ორმოებს ამოავსებდა. ჩვენ ვთქვით, რომ უნდა ვიყოთ ის ადამიანები, ვინც ამ ქალაქში გაატარებს რეფორმებს, რომელიც შეიძლება იყოს მტკივნეული არაპოპულარული, მაგრამ სასიცოცხლოდ მნიშვნელოვანი ჩვენი ქალაქისა და ჩვენი შვილებისთვის. ჩვენ 30 წლის განმავლობაში ვტრიალებთ ერთი და იმავე წრეზე, როდესაც ეს გადაწყვეტილება მივიღეთ, დავიწყეთ მუშაობა საარჩევნო პროგრამაზე, რომელიც შედგებოდა შვიდი ძირითადი მიმართულებისგან, ეს იყო კონკრეტული ხედვა პრობლემები, რომელიც აწუხებდა თბილისს. 30 წლის განმავლობაში ეს იყო ის პრობლემები, რომელიც ტკიოდა თბილისელებს, ჩვენ წარმოვადგინეთ ჩვენი ხედვა და გადასადგმელი ქმედითი ნაბიჯები რა უნდა გაგვეკეთებინა ამ პრობლემების მოსაგვარებლად“, – განაცხადა კახა კალაძემ.
მისივე თქმით, ერთ-ერთი მიმართულება იყო სატრანსპორტო პოლიტიკა, რომელზეც ყველა თანხმდება, რომ არის უმძიმეს მდგომარეობაში.
„როდესაც დავიწყეთ ამ მიმართულებით მუშაობა დავიწყეთ, მოვიძიეთ მსოფლიოში ყველაზე ძლიერი კომპანიები, ექსპერტები, რომელთაც ანალოგიური პროექტები ჰქონდათ გაკეთებული. ვინმემ არ მინდა იფიქროს, რომ ეს არის ჩემი ახირება და ხუშტურები. ბევრ ქალაქში ვარ ნამყოფი, მინდა და მაქვს ამბიცია, რომ ყველაფერი საუკეთესო, რაც განვითარებულ ევროპულ ქალაქებშია გაკეთებული, ჩემს ქალაქშიც განხორციელდეს, ეს უნდა მოხდეს გათვლით სტრატეგიებითა და კონკრეტული პროექტების განხორციელებით. კომპანიები, რომლებიც ჩვენ მოვიძიეთ, ეს არის უძლიერესი კომპანიები, ეს არის „ლოტმაგდონალდსი“ ბრიტანული კომპანია, „რამბოლი“ დანიური კომპანია, „სისტრა“ ფრანგული კომპანია, „გოპა“ გერმანბული კომპანია. ამ კომპანიებთან ჩვენ ვმუშაობთ. სტრატეგია, დაგეგმარება, მარშრუტები და რეფორმები წამოვიწყეთ ამ კომპანიების მხარდაჭერით, ისინი მუშაობდნენ ევროპულ განვითარებულ ქალაქებში“, – განაცხადა კახა კალაძემ.