პრეზიდენტის ადმინისტრაციამ ტელეკომპანია „მთავარი არხის” დამფუძნებლის, ნიკა გვარამიას მიერ გამოქვეყნებული Facebook-სტატუსის გამო, პოსტის შესწავლისა და უფლებამოსილებისა და კომპეტენციის ფარგლებში რეაგირების თხოვნით, მედიის განვითარების ფონდსაც მიმართა.
მედიის განვითარების ფონდმა, ცოტა ხნის წინ, ამ მიმართვის საპასუხო განცხადება გამოაქვეყნა:
„ვთვლით, რომ აღნიშნული საკითხი Facebook-ზე ჩვენი უფლებამოსილების და კომპეტენციის ფარგლებს სცილდება. Facebook-ის ფაქტების გადამოწმების პროგრამის ფარგლებში, ჩვენ ვრეაგირებთ Facebook-ზე ვირუსულად გავრცელებულ ყალბ ინფორმაციაზე და აღნიშნული სოციალური ქსელის პოლიტიკის თანახმად, Facebook-ზე გამოთქმული მოსაზრებების გადამოწმება ჩვენი პროგრამული ამოცანის მიღმაა. MDF-მა უკვე მოახდინა რეაგირება პრეზიდენტის შესახებ სოციალურ ქსელებში გავრცელებულ ყალბ ცნობებზე და ფეისბუკზე რამდენიმე პოსტი მონიშნა“ – აღნიშნულია განცხადებაში.
იქამდე, პრეზიდენტის ადმინისტრაციამ ჟურნალისტური ეთიკის ქარტიას მიმართა. პრეზიდენტის ადმინისტრაცია ქარტიისგან ითხოვდა, უფლებამოსილების ფარგლებში, რეაგირება მოეხდინა ტელეკომპანია „მთავარი არხის” დამფუძნებლის ნიკა გვარამიას მიერ, ფეისბუქის პირად გვერდზე, პრეზიდენტის მიმართ გამოქვეყნებულ ციტატა: „შეურაცხმყოფელ და ყოვლად მიუღებელ” პოსტთან დაკავშირებით. ქარტიამ კი, განცხადება გაავრცელა და თქვა, რომ სოციალურ ქსელში გავრცელებული პირადი მოსაზრება მედია პროდუქტს არ წარმოადგენს. შესაბამისად, ქარტიის საბჭო ვერ შეაფასებს ტელეკომპანია „მთავარი არხის” ერთ-ერთი მფლობელისა და გენერალური დირექტორის, ნიკა გვარამიას სტატუსს, რომელიც ფეისბუქის პირად გვერდზე გამოაქვეყნა. ამ განცხადების გამო, ეთიკის ქარტია ჟურნალისტებმა, ნინო კაკულიამ და მანუჩარ პირველმა დატოვეს.