ახალგაზრდა ბიჭი, რომელიც თბილისში საკუთარმა ძმამ მოკლა, ფეხბურთელი მიშო ახლოურია.
სასიკვდილო ჭრილობები მიშო ახლოურს 21 წლის ძმამ მიაყენა. ოფიციალური ინფორმაციით, მიზეზი ურთიერთშელაპარაკებაა.
დაპირისპირება ძმებს შორის გვიან ღამით დაიწყო. დაჭრილი გადაიყვანეს საავადმყოფოში, სადაც მალევე გარდაიცვალა.
როგორც ცნობილია, მიშო „საბურთალოს“ აკადემიის ფეხბურთელი იყო და გიორგი შაქარაშვილს კარგად იცნობდა.
ჯერჯერობით, გარდაცვლილის ძმა დუმილის უფლებით სარგებლობს და საქმის დეტალებზე არ საუბრობს.
აღსანიშნავია ისიც, რომ განზრახ მკვლელობის მცდელობის ფაქტს უარყოფს.
როგორც ოჯახის ახლობელი „კვირის პალიტრასთან“ საუბრისას აღნიშნავს, გაბრაზებულმა ბრალდებულმა დანა ძაღლს მოუქნია და შემთხვევით, მიშოს მოხვდა.
„გიორგი თურმე ამბობს, სამჯერ ვთხოვე ჩემს ძმას ტელევიზორისთვის დაეწია, დაუწევდა, მაგრამ ისევ ხმამაღლა უწევდა, უკვე მესამედ რომ აუწია, მივედი და ტელევიზორს ანტენა მოვაძვრე. ამის გამო წავკამათდითო.
ძმების კამათზე მიშოს ძაღლი გამოიქცა… ძაღლმა მიშოს დაცვა სცადა და გიორგის უყეფდა, მისკენ მიიწევდა…
ეტყობა, ძაღლის ყეფამ გიორგი გააღიზიანა, გაბრაზებულმა ძაღლს დანა მოუქნია, სიბნელე იყო დერეფანში ვერ დაინახა მიშო და ძაღლისთვის ძლიერად მოქნეული დანა შემთხვევით მიშოს მოხვდა.
ვერ დავიჯერებ, რომ მიშოს მოკვლა უნდოდა. მერე თურმე ყველაფერს აკეთებდა ძმის გადასარჩენად.
ბიჭების მამაც სახლში იყო ამ დროს, მაგრამ მას სხვა ოთახში ეძინა…
მას არაფერი დაუნახავს… განადგურებულია ოჯახი…
5 შვილი ჰყავთ, მშობლები ახალი გაშორებულები არიან და მიშოს დედა სამ შვილთან ერთად თავის სახლში იყო.
ამ ბინაში კი მიშო და გიორგი მამასთან ერთად იყვნენ“, – განაცხადა ოჯახის ახლობელმა.
მომხდართან დაკავშირებით განცხადება გაავრცელა შინაგან საქმეთა სამინისტრომ:
„შინაგან საქმეთა სამინისტროს თბილისის პოლიციის დეპარტამენტის საგამოძიებო მთავარი სამმართველოს თანამშრომლებმა, ცხელ კვალზე ჩატარებული ოპერატიულ-სამძებრო და საგამოძიებო მოქმედებების შედეგად, 1999 წელს დაბადებული გ.ა. ოჯახის წევრის მიმართ ჩადენილი განზრახ მკვლელობის ბრალდებით დააკავეს.
დანაშაული 7-დან 15 წლამდე ვადით თავისუფლების აღკვეთას ითვალისწინებს.
გამოძიებით დადგინდა, რომ ბრალდებულმა ძმას – 2001 წელს დაბადებულ მ.ა.-ს, ურთიერთშელაპარაკების ნიადაგზე, ცივი იარაღის გამოყენებით სხეულზე ჭრილობა მიაყენა. დაჭრილი მამაკაცი სასწრაფო სამედიცინო დახმარების ჯგუფმა საავადმყოფოში გადაიყვანა, თუმცა მისი გადარჩენა ვეღარ მოხერხდა.
სამართალდამცველებმა დანაშაულის ჩადენის იარაღი – დანა ნივთმტკიცებად ამოიღეს.
ოჯახის წევრის მიმართ ჩადენილ განზრახ მკვლელობის ფაქტზე გამოძიება საქართველოს სსკ-ის 11 პრიმა-108-ე მუხლით მიმდინარეობს,“ – ნათქვამია შსს-ს განცხადებაში.