ძალიან ცდილობენ, მოდაში შემოიტანონ მონობის ნარატივი და აზრი, თითქოს შეზღუდვა მონობაა. ეს ჩვენი ევროპელი მეგობრების მიმართაც შეურაცხყოფაა, რადგან არ იაზრებენ, რომ ჩვენი მეგობარ ქვეყნებშიცაა შეზღუდვები. არაფერია იმაზე სპეკულაციური მესიჯი, ვიდრე ის, რომ შეზღუდვების დამორჩილება მონობაა, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ პარტიის ოფისში გამართულ ბრიფინგზე განაცხადა.
„შეზღუდვებმა, რომელიც ჩვენ წინა პერიოდში გვქონდა, გარკვეული პოზიტიური შედეგი მოგვცა და ამას, შეიძლება, გადარჩენაც კი დავარქვათ. ყველას ძალიან კარგად გვახსოვს, რის წინაშე ვიდექით სულ რამდენიმე კვირის წინ. დღეში 5 000 ინფიცირებული ჩვენთვის კი არა, ჩვენზე ბევრად ძლიერი ქვეყნებისთვისაც, უდიდესი და უსერიოზულესი პრობლემაა. მმართველ გუნდში, არავის უხარია რაიმე შეზღუდვის დაწესება ან გამკაცრება. ეს მოქალაქეების ინტერესებს ემსახურება. მაშინ, როცა ჩვენ ვცხოვრობთ ქვეყანაში, სადაც სოციალური პრობლემები ჯერ კიდევ ძალიან ბევრია, რა თქმა უნდა, თითოეული ასეთი საკითხი ძალიან სენსიტიურად აღიქმება განსაკუთრებით იმ ადამიანების მიერ, ვისაც ეს უშუალოდ ეხებათ. სამწუხაროდ, ასეთი ადამიანი ძალიან ბევრია და ამით სპეკულირება, ნაცვლად იმისა, რომ ვირუსის მხარეს კი არა, სახელმწიფოს მხარეს იდგნენ, აქაც კი, სპეკულაციას მიმართავენ. ისინი ვირუსის მხარეს დგანან და, სამწუხაროდ, ეს ყველაფერი უხარიათ“ – განაცხადა მამუკა მდინარაძემ.