გირგვლიანის მკვლელობა შეუკვეთეს, აწამეს, მოკლეს და დღეს ეს ადამიანები გეუბნებიან, იცით რა, იქ ბერამ ვიღაცას რაღაც შეუკვეთაო, – ამის შესახებ პარლამენტის ვიცე-სპიკერმა, გია ვოლსკიმ გავრცელებულ ჩანაწერზე საუბრისას „რუსთავი 2“-ის ეთერში განაცხადა.
„მე არ ვარ ვალდებული პასუხი გავცე კითხვებს, იმ ადამიანების წინაშეც არ ვარ ვალდებული, ვინც მკვლელებს ედგნენ გვერდში. სანდრო გირგვლიანის მკვლელობა შეუკვეთეს, დაავალეს და მოკლეს, რეალურად აწამეს და მოკლეს ადამიანი. დღეს ეს ადამიანები დგანან და გეუბნებიან, იცით რა, იქ ბერამ ვიღაცას რაღაც შეუკვეთაო. რაც შეეხება მურუსიძეს, მე მისი ადვოკატი არ ვარ, მაგრამ მას დაუწერეს კანონი, რომლის მიხედვითაც, ის შედეგი უნდა დამდგარიყო, რაც დადგა.
ბოროტება იმაშია, რომ მურუსიძეს კანონი დაუწერეს, დღეს დგანან და იმათი გამოძახილებით შეკითხვებს ვუსვამთ ერთმანეთს. ეს ხალხი დღეს, შემკვეთიც და მწამებელიც, ამ ადამიანების გვერდით დგანან გინდათ, „ლელო“ აიღეთ და გინდათ, სხვა პარტია და აქედან მორალს გვიკითხავენ 11 წლის წინ რა განცხადება გააკეთა ბავშვმა, რომელსაც უწმაწურად აგინეს. ეს არის უზნეობა და უნდათ, რომ ჩვენი ახალგაზრდები ამ უზნეობაში ჩართონ“, – განაცხადა გია ვოლსკიმ.