ევროპარლამენტის სამხრეთ კავკასიასთან ურთიერთობების დელეგაციის თავმჯდომარე, მარინა კალიურანდი და ევროპარლამენტის მომხსენებელი საქართველოს საკითხზე, სვენ მიქსერი აცხადებენ, რომ დროა საქართველოში პოლიტიკური კრიზისი დასრულდეს სტაბილურობისა და ევროატლანტიკური მომავლისთვის.
„მე არ ვეთანხმები ოპოზიციის ლიდერის, ნიკა მელიას დაპატიმრებას, რაც კიდევ უფრო ზრდის პოლიტიკურ დაძაბულობას. ხელისუფლების წარმომადგენლებს განსაკუთრებული პასუხისმგებლობა ეკისრებათ ამ დაძაბულობის განმუხტვაზე, ასევე იმაზე, რომ ამჟამინდელი პოლიტიკური დაპირისპირებიდან გამოსავალი მოძებნონ და პროვოკაციებს არაპროპორციული მეთოდებით არ უპასუხონ. მნიშვნელოვანია ხაზგასმით აღვნიშნოთ, რომ საქართველოში პოლიტიკური ვითარება ძალზე რთულია. დაძაბულობა მაღალია მას შემდეგ, რაც გასული წლის ნოემბერში „ქართულმა ოცნებამ“ საპარლამენტო არჩევნები მოიგო. მიუხედავად იმისა, რომ გარკვეული დარღვევების მიუხედავად, ოდირმა არჩევნები კონკურენტულად შეაფასა, ოპოზიციამ ბოიკოტი გამოუცხადა მეორე ტურს და მას შემდეგ ბოიკოტს უცხადებს პარლამენტს. მე მოვუწოდებ ოპოზიციას, დაბრუნდეს პარლამენტში და ვურჩევ ევროპარლამენტში მყოფ მათ მეგობარ პარტიებს, მხარი დაუჭირონ ამ მოწოდებას. საქართველოს პარლამენტი არის პოლიტიკური უთანხმოების მოსაგვარებელი და საარჩევნო რეფორმისა და სასამართლო სისტემის რეფორმაზე მუშაობის გასაგრძელებელი ადგილი. ქართველი ხალხის ლეგიტიმური მისწრაფება დემოკრატიისა და კეთილდღეობისკენ, ისევე როგორც ქვეყნის სტაბილურობა და ევროატლანტიკური მომავალი, არ შეიძლება იყოს რომელიმე პარტიის პოლიტიკური ინტერესების მძევალი. ამიტომ, ნეიტრალური შეხედულებების მქონე პირებმა როგორც მმართველ პარტიაში, ასევე ოპოზიციაში უნდა მოიპოვონ უპირატესობა და პოლიტიკურ დაყოფაზე მაღლა უნდა დადგნენ, რათა გადაჭრან არსებული პოლიტიკური კრიზისი”, – განაცხადა სვენ მიქსერმა.
„წლების განმავლობაში, საქართველო განიხილებოდა, როგორც ევროკავშირის აღმოსავლეთ პარტნიორობის მოდელი, რომელიც შექებას იმსახურებდა მისი სოციალ-ეკონომიკური განვითარებისა და პროევროპული რეფორმებისთვის. სამწუხაროდ, ახლა ყველა ეს მიღწევა რისკის ქვეშ დგას. დასაკარგი დრო არ არის. საქართველოს პოლიტიკური აქტორები სამომავლო ამოცანებზე უნდა ფოკუსირდნენ, კერძოდ კი პანდემიის სოციალურ-ეკონომიკურ შედეგებსა და პრო-ევროპულ რეფორმებზე დემოკრატიისა და კანონის უზენაესობის საკითხებში. ამჟამინდელი პოლიტიკური კრიზისი ხაზს უსვამს სასამართლო რეფორმების გაგრძელების მნიშვნელობას სასამართლო დამოუკიდებლობის გაზრდისა და უმაღლესი სასამართლო სტანდარტების დამკვიდრებისთვის. ეს ეხება განსაკუთრებით უზენაესი სასამართლოს მოსამართლეების დანიშვნას“, – აღნიშნავს მარინა კალიურანდი.