საქართველო უამრავი გამოწვევის წინაშე დგას, მათ შორის არის კოვიდ-19-ის პანდემია, ეკონომიკური განვითარება და უსაფრთხოება, ამიტომ პოლიტიკურმა ლიდერებმა სწრაფად უნდა გადალახონ ეს პოლიტიკური კრიზისი, – ამის შესახებ ევროპარლამენტში საქართველოს საკითხზე გამართული დებატების დროს ევროპარლამენტის საგარეო ურთიერთობათა კომიტეტის თავმჯდომარემ, დევიდ მაკალისტერმა განაცხადა.
„შეშფოთებით ვაკვირდებით საქართველოში მიმდინარე მოვლენებს. მხარს ვუჭერ ყველა ფასილიტატორის ძალისხმევას, რომელიც მიმართულია ოპოზიციასა და მთავრობას შორის დიალოგის გაძლიერებაზე. საქართველო უამრავი გამოწვევის წინაშე დგას, მათ შორის არის კოვიდ-19-ის პანდემია, ეკონომიკური განვითარება და უსაფრთხოება. ამიტომაც, პოლიტიკურმა ლიდერებმა სწრაფად უნდა გადალახონ ეს პოლიტიკური კრიზისი და ერთად გრძელვადიანი პოლიტიკური გადაწყვეტილება გამონახონ. ეს გადაწყვეტილება მოიცავს ამბიციურ საარჩევნო რეფორმას, კანონის უზენაესობასა და სასამართლო რეფორმას, პარლამენტში ძალაუფლების განაწილებას და შესაძლო ახალ არჩევნებს. იმედია, მომავალ კვირას ევროკავშირისა და საქართველოს ასოცირების საბჭოს შეხვედრაზე დიალოგში პროგრესი დაფიქსირდება“, – განაცხადა დევიდ მაკალისტერმა.
საქართველოში ვიზიტის ფარგლებში, ევროპული საბჭოს პრეზიდენტი შარლ მიშელი ხელისუფლებისა და ოპოზიციის წარმომადგენლებს შეხვდა და მხარეებს შეთანხმებისკენ მოუწოდა. მოგვიანებით შარლ მიშელმა ევროკავშირის უმაღლეს წარმომადგენელ ჟოზეპ ბორელთან შეთანხმებით საქართველოში პოლიტიკური დიალოგის მედიაციისთვის თავის წარმომადგენლად კრისტიან დანიელსონი დანიშნა.