რამდენიმე დღის წინ ოპოზიცია ამბობდა, რომ ყველანაირი დიალოგი დასრულდა, ამაზე ვამბობდი, რომ ეს იყო ხელოვნურად აწეული სკანდალის მთავარი მიზანი და მიზეზიც. თუმცა, მას შემდედ, რაც ევროკავშირის პოზიცია მკაფიოდ გამჟღავნდა, ოპოზიცია იძულებული იყო, რომ შეეცვალა თავისი ლექსიკა, პოზიცია და დღეს ისევ დიალოგზე დაიწყეს ლაპარაკი, – ამის შესახებ საპარლამენტო უმრავლესობის წევრმა, სოზარ სუბარმა განაცხადა.
„დიალოგთან დაკავშირებით ჩვენ სულ ვამბობთ, რომ ამას ალტერნატივა არ აქვს, დათმობებს რაც შეეხება, მაქსიმალური არის „ქართული ოცნების“ მხრიდან გაკეთებული, რომ ჩვენ მივდივართ ახალ არჩევნებზე, თუ საგამოძიებო კომისიის ფარგლებში დადგინდა, რომ გაყალბება ერთ პროცენტზე მეტს აღწევს. მაგრამ ოპოზიცია ამაზე არ მოდის, რადგან ძალიან კარგად იციან, რომ გაყალბება არ მომხდარა“, – განაცხადა სოზარ სუბარმა.