როცა „ნაციონალურ მოძრაობას“ და ოპოზიციას მაშველი რგოლი სჭირდება, რუსეთი იქვე გამოხტება ხოლმე, მათ შორის, გავრილოვის ცნობილი განცხადებები გაიხსენეთ, – ამის შესახებ საპარლამენტო უმრავლესობის წევრმა, ირაკლი ზარქუამ განაცხადა.
ზარქუამ კომენტარი გააკეთა რუსეთის საგარეო დაზვერვის სამსახურის დირექტორის, სერგეი ნარიშკინის განცხადებაზე, რომლის მიხედვითაც, „ბოლო პერიოდში ვაშინგტონში იზრდება უკმაყოფილება „ქართული ოცნების“ ქმედებების გამო, რომელიც ამერიკული მოთხოვნების უსიტყვოდ შესრულებას თავს არიდებს“. ამავე განცხადების მიხედვით, საქართველოში წესრიგის დასამყარებლად ამერიკელები გეგმავენ, ოპოზიციონერების მხარდაჭერისა და „ქართული ოცნების“ პოზიციების შერყევის სისტემური სამუშაო ააწყონ. ნარიშკინის თქმითვე, „აშშ განაწყობს ევროპულ პარტნიორებს ქართული ოპოზიციის მხარდასაჭერად“.
„მოსახლეობამ საკუთარი პოზიცია დააფიქსირა, რომ ევროატლანტიკური სივრცის წევრი იყოს, ყველა ნაბიჯი დაგეგმილია ევროკავშირისა და ნატო-სკენ. ნატო-ს წარმომადგენლები თავად ამბობენ, რომ საქართველო ისე ახლოს არ ყოფილა ნატო-სთან, როგორც ახლა არის. ეს თემები ოპოზიციამ შეუნახოს ნარიშკინსა და გავრილოვს“, – განაცხადა ზარქუამ.