არაადამიანობაა, როდესაც 10-11 წლის გოგო-ბიჭებზე თვეების განმავლობაში მასირებული შეტევა, ბულინგი და მუქარა მიმდინარეობს. ამის შემდეგ ანზორ ჩუბინიძე მიდის ამ ადამიანებთან და მშობლების თანდასწრებით ეკითხება, რა დგას ამ მუქარების უკან და ნორმალურ კალაპოტში ჩადგომას სთავაზობს. ეს არის ადამიანობა და ეს არის განსხვავება ამ ორ სამყაროს შორის, – ამის შესახებ „ქართული ოცნების“ პოლიტსაბჭოს წევრმა, სოზარ სუბარმა განაცხადა.
„რა არის განსხვავება ადამიანობასა და არაადამიანობას შორის? არაადამიანობაა, როდესაც ერთი სიტყვის გამო საქართველოს ყოფილი პრეზიდენტი აგზავნის სოდ-ის სპეცრამზს, რომელიც სასიკვდილოდ იმეტებს პარლამენტის წევრს ვალერი გელაშვილს. არაადამიანობაა, როდესაც ერთი სიტყვის გამო კუდ-ის მაღალჩინოსნები და შს მინისტრის მოადგილე იტაცებენ ადამიანს, აჰყავთ სასაფლაოზე, აწამებენ და წამებით კლავენ მას. არაადამიანობაა, როდესაც ამის შემდეგ მთელი სახელმწიფო მანქანა, პროკურატურა, პარლამენტი, სასამართლო ერთად აყალბებენ ამ საქმეს. არაადამიანობაა, როდესაც ამის შემდეგ შს მაღალჩინოსანი აცხადებს, რომ ეს ადამიანი სვანურ კრიმინალურ დაჯგუფებებს შორის ანგარიშსწორებას ემსხვერპლა. არაადამიანობაა, როდესაც 10-11 წლის გოგო-ბიჭებზე თვეების განმავლობაში მასირებული შეტევა, ბულინგი და მუქარა მიმდინარეობს. ამის შემდეგ ანზორ ჩუბინიძე მიდის ამ ადამიანებთან და მშობლების თანდასწრებით ეკითხება, რა დგას ამ მუქარების უკან და ნორმალურ კალაპოტში ჩადგომას სთავაზობს. ეს არის ადამიანობა და ეს არის განსხვავება ამ ორ სამყაროს შორის“, – განაცხადა სუბარმა.
ის ასევე გამოეხმაურა ბერა ივანიშვილის ინტერვიუს და განაცხადა, რომ ავთენტურობასთან დაკავშირებით ინტერვიუში საუბარი საერთოდ არ ყოფილა.
„ჩემი აზრით, მკაფიო დანაშაულია, როდესაც ადამიანებს უკანონოდ იწერენ. ამასთან დაკავშირებით აღძრულია საქმე და დადგინდება დამნაშავე. რაც შეეხება ბერა ივანიშვილის ინტერვიუს, იქ არანაირი საუბარი ავთენტურობაზე არ ყოფილა. ითქვა ის, რაზეც აქამდეც ვსაუბრობდით, რომ ეს არის ათობით სხვადასხვა ჩანაწერი, საიდანაც ამოკრეფილია სიტყვები. ქმედება, რომელსაც არ ჰყავს დაზარალებული, დანაშაული ვერ იქნება“, – განაცხადა სუბარმა.