მე არ ვარ გამომძიებელი, არც პროკურორი, საქმის მასალებს დეტალურად ვერ ვიტყვი – ორი „ჩიპია“ საჭირო თუ ოთხი კონვერტი, მაგრამ ყველა ის მასალა, რაც გამოძიებას სჭირდება და სასამართლოს აქვს ნებართვა მიცემული, ყველა მხარემ უნდა ითანამშრომლოს და მიაწოდოს, – ასე გამოეხმაურა პარლამენტის საპროცედური საკითხთა და წესების კომიტეტის თავმჯდომარე ირაკლი ქადაგიშვილი სასამართლოს მიერ პროკურატურისთვის მიცემულ თანხმობას, ტელეკომპანია „ტვ პირველში“ საგამოძიებო მოქმედებების ჩატარების შესახებ.
როგორც ქადაგიშვილმა აღნიშნა, სასამართლოს არ აქვს არანაირი საშუალება, რომ რაიმე ექსკლუზიური უფლება მიანიჭოს რომელიმე აღმასრულებელ თუ საგამოძიებო ორგანოს გარდა კანონით განსაზღვრული წესისა.
„ყველა ის მხარე, რომელიც არის კანონმორჩილი და დარწმუნებული ვარ, მედიაც კანონმორჩილია, ვალდებულია ითანამშრომლოს გამოძიებასთან, მიაწოდოს ყველა საჭირო ინფორმაცია. აქედან გამომდინარე, პროკურატურას ჰქონდა სატელეფონო კომუნიკაცია ტელევიზიის მესვეურებთან, ასევე მიმოწერაც. სასამართლოს განჩინება მიღებულია და ღრმად ვარ დარწმუნებული იმაში, რომ ტელევიზია თავის ვალდებულებას პირნათლად შეასრულებს და მიაწოდებს იმ მასალას პროკურატურას, რასაც უწყება ითხოვს. მე არ ვარ გამომძიებელი, მე არ ვარ პროკურორი, საქმის მასალებს დეტალურად ვერ ვიტყვი – ორი „ჩიპია“ საჭირო თუ ოთხი კონვერტი, მაგრამ ყველა ის მასალა, რაც გამოძიებას სჭირდება და სასამართლოს აქვს ნებართვა მიცემული, ყველა მხარემ უნდა ითანამშრომლოს და მიაწოდოს.
ნუ შეგყავთ საქართველოს მოქალაქეები შეცდომაში, რაც განჩინებაში წერია, წერია კონსტიტუციიდან და კანონიდან გამომდინარე. სასამართლოს არ აქვს არანაირი საშუალება, რომ რაიმე ექსკლუზიური უფლება მიანიჭოს რომელიმე აღმასრულებელ თუ საგამოძიებო ორგანოს გარდა კანონით განსაზღვრული წესისა“, – განაცხადა ქადაგიშვილმა.
შეგახსენებთ, რომ „ტვ პირველის“ ინფორმაციით, სასამართლოს განჩინების მიხედვით, პროკურატურას ტელეკომპანიაში საგამოძიებო მოქმედებების ჩატარების უფლება მიეცა.