31 ოქტომბრის საპარლამენტო არჩევნების შესახებ IRI-ის დასკვნაზე ოპოზიციაში გამოხმაურებები გრძელდება. ხელისუფლების ოპონენტთა განცხადებები თითქმის იდენტურია, შედარებით განსხვავებულია პარტია “გირჩის” ლიდერის პოზიცია.
იაგო ხვიჩიას განცხადებით, ოპოზიციამ ვერ წარუდგინა ფასილიტატორებსა და საერთაშორისო საზოგადოებას არჩევნების გაყალბების რეალური ფაქტები და შესაბამისად, მსგავსი დასკვნები ორგანიზაციის მხრიდან უჩვეულო არ არის.
იაგო ხვიჩია ამბობს, რომ არჩევნების გაყალბებაზე, მანამდე ვერ ისაუბრებს, ვიდრე ოპოზიციას მტკიცებულება არ ექნება.
“ოპოზიციამ ვერ წარადგინა ამის სათანადო მტკიცებულება ფასილიტატორებთან და საერთაშორისო საზოგადოებასთან, მაგიტომაც ხდება ასეთი ტიპის დასკვნების წარმოდგენა პასუხად. ჩვენ ვამბობდით და საჯაროდაც გვაქვს ნათქვამი, რომ სანამ მტკიცებულებები არ გვექნება ოპოზიციას, მანამდე მე არ ვიყვირებ იმას, რომ არჩევნები გაყალბდა და ამაზე არ ვილაპარაკებ როგორც დამტკიცებულ ფაქტზე,” – აღნიშნა იაგო ხვიჩიამ.