საქართველოს პარლამენტის ადამიანის უფლებათა დაცვის კომიტეტის თავმჯდომარის, მიხეილ სარჯველაძის განცხადებით, შეთავაზებებს, რაც მმართველი გუნდის მხრიდან გაკეთდა, საკმარისი რესურსი აქვს იმისთვის, რომ შეთანხმება უნარიანი იყოს.
როგორც ჟურნალისტებს სარჯველაძემ განუცხადა, ოპოზიციური პარტიების დამოკიდებულება იმთავითვე არ იყო კონსტრუქციული და ეს მოცემულობა ახლაც გრძელდება.
„ის, თუ რა არის მოლაპარაკებების პირობები და რა შეიძლება იყოს მოლაპარაკებების საგანი, ამაზე საუბარი არ შეგვიძლია. ინიციატივა იმის თაობაზე, რომ მოლაპარაკებები ინტენსიურ რეჟიმში გაგრძელდება, იმედი მაქვს, ეს შედეგიანი აღმოჩნდება და გადაიდგმება რეალური ნაბიჯები ოპოზიციის მხრიდან, რომ პროცესი შედეგიანი აღმოჩნდეს. მთავარია, ოპოზიციის განწყობა შეთანხმების მიღწევაზე იყოს ორიენტირებული. რაც შეეხება საკითხს იმის თაობაზე, რა ინფორმაციას მიაწვდის პრემიერ-მინისტრი ბრიუსელში ვიზიტის დროს ევროპელ კოლეგებს, ალბათ, ეს იქნება ინფორმაცია მიმდინარე მოლაპარაკებების თაობაზე და იმ გარემოებების შესახებ, რაც მისი ხედვით, შესაძლოა, შეთანხმების პროცესს აბრკოლებდეს”, – განაცხადა სარჯველაძემ.