როგორც ჩანს, ქალბატონ ნინო ბურჯანაძეს პერიოდულად ნოსტალგია შემოაწვება ხოლმე ბატონი ვლადიმერ პუტინის მიმართ, – ასე გამოეხმაურა ოპოზიციონერი დეპუტატი, პარტია „მოქალაქეების“ წევრი ლევან იოსელიანი „ერთიანი საქართველოს“ ლიდერის, ნინო ბურჯანაძის განცხადებას.
მისი თქმით, ბურჯანაძის დამოკიდებულება რუსეთის მიმართ აქამდეც ცნობილი იყო და არაფერი შეცვლილა.
„როგორც ჩანს, ქალბატონ ნინოს პერიოდულად ნოსტალგია შემოაწვება ხოლმე ბატონი ვლადიმერ პუტინისა და რუსეთის მიმართ. მისი პოზიცია ცნობილია. მისი დამოკიდებულება რუსეთის მიმართ აქამდეც ვიცოდით. სამწუხაროა, მაგრამ არაფერი შეცვლილა“, – განაცხადა ლევან იოსელიანმა.
„ერთიანი საქართველოს“ ლიდერმა, ნინო ბურჯანაძემ რადიოსადგურ „ეხო მასკვისთან“ ინტერვიუში განაცხადა: რუსეთ-საქართველოს ურთიერთობების გაუმჯობესება რუსეთში მხოლოდ ვლადიმერ პუტინს შეუძლია.