უკრაინის მთავრობამ თანამდებობიდან გადააყენა „უკრაინის რკინიგზის“ ხელმძღვანელი, მიხეილ სააკაშვილის ყოფილი მოადგილე ვლადიმირ ჟმაკი, რომლის გადაყენებასაც მანამდე კომპანიის სამეთვალყურეო საბჭომ მხარი ერთხმად დაუჭირა. უკრაინული მედიის ცნობით, კომპანიის ხელმძღვანელის მოვალეობებს დროებით ივან იურიკი შეასრულებს.
ოდესის საოლქო ადმინისტრაციაში მიხეილ სააკაშვილის მუშაობის პერიოდში ვლადიმირ ჟმაკი მისი პირველი მოადგილე იყო.
გამოცემა Liga.net-ი წერს, რომ ჟმაკის გადაყენების მიზეზი კომპანიის გაყოფისა და რესტრუქტურიზაციის განსხვავებული ხედვაა და არსებული ეჭვები იმასთან დაკავშირებით, რომ ჟმაკი ოლიგარქ რინატ ახმეტოვის ინტერესებს ატარებდა.
ვლადიმირ ჟმაკის განცხადებით, ის სამეთვალყურეო საბჭოს სხდომას არ ესწრებოდა და ამ გადაწყვეტილების შესახებ მისთვის არავის უცნობებია.
მანამდე მიხეილ სააკაშვილის კადრმა ირაკლი ეზუგბაიამ, რომელსაც კორუფციაში ადანაშაულებდნენ, „უკრაინის რკინიგზის“ კომერციული დირექტორის თანამდებობა დატოვა. უკრაინული მედია წერდა, რომ მიხეილ სააკაშვილის თანამოაზრეები, მათ შორის უკრაინის ეროვნული ანტიკორუფციული ბიუროს დირექტორის მოადგილე გიზო უგლავა „უკრაინის რკინიგზის“ სატვირთო გადაზიდვებიდან მიღებულ შემოსავლებს იტაცებენ.