საქართველოს პოლიტპატიმრები არ ჰყავს. სხვას არაფერს ვიტყვი, რადგან ჩვენ ოპონენტებისგან განსხვავებით, მაღალ პასუხისმგებლობას ვიჩენთ, რომ არ გვინდა, მოლაპარაკებას ჩრდილი მიადგეს. სწორედ ამიტომ მოლაპარაკებების დეტალებზე არ ვისაუბრებ, – ამის შესახებ პარლამენტის ადამიანის უფლებათა დაცვის კომიტეტის თავმჯდომარის პირველმა მოადგილემ ალუდა ღუდუშაურმა განაცხადა.
მისივე თქმით, სასურველია, ნიკა მელიამ გირაო გადაიხადოს. ღუდუშაური ასევე ამბობს, რომ პროცესის შედეგით დასრულება ქვეყნისთვის მნიშვნელოვანია.
„საზოგადოება მოლაპარაკების დასრულების შემდეგ იმ ნაბიჯებს იხილავს, რასაც დგამდა ხელისუფლება და როგორი საპირისპირო ნაბიჯი ჰქონდა ოპოზიციას. ვისურვებდი, ნიკა მელიამ მაღალი პასუხისმგებლობა გამოიჩინოს. მის ადგილზე გირაოს გადავიხდიდი და ხელს არ შევუშლიდი მოლაპარაკებას, რომლის შედეგიანად დასრულება მნიშვნელოვანია ჩვენი ქვეყნისთვის“, – განაცხადა ალუდა ღუდუშაურმა.