“ისე როგორ უნდა გაგიჭირდეს, რომ ცილისმწამებლურ აბსურდის მწვერვალს ებღაუჭებოდე და საკუთარ უბედურ “მრევლს” კვებავდე“

დაუჯერებელია დე-ფაქტო ხელისუფლებას თავისი ციხეების არქივში მსგავსი ფაქტი ჰქონოდა და არ გაეშუქებინა, რადგან არცერთი უკანონოდ დაკავებული ქართველის დაოქმებული ინფორმაცია ციხიდან არ ქრება, ერთი მარტივი მიზეზის გამო, – განთავისუფლების წინა პირობას წარმოადგენს ე.წ. „სახელმწიფო“ საზღვრის გადაკვეთის აღიარება, – ასე ეხმიანება ექსპერტი დავით ქართველიშვილი, ,,მთავარი არხის’’ ეთერში შს მინისტრის ვახტანგ გომელაურის შესახებ გავრცელებულ ინფორმაციას.

,,თქვენ ვერც წარმოიდგენთ, რა ფორმით, რა რაკურსით და დღემდე რამდენჯერ იქნებოდა გაშუქებული ცხინვალის დე-ფაქტო ხელისუფლების მიერ მათი ციხის ისტორიაში, ორი ყველაზე VİP და TOP პიროვნების – საქართველოს შსს-ს მოქმედი მინისტრის და სახელმწიფო დაცვის სპეცსამსახურის უფროსის მოადგილის, საკანში თუნდაც ხანმოკლე მოთავსების უნიკალური ამბავი. ცხინვალს ციხის არქივებიდან შეიძლება გაქრეს კვაისას ან ჯავას მკვიდრთა საქმეები, მაგრამ არც ერთი უკანონოდ დაკავებული ქართველის შესახებ დაოქმებული ინფორმაცია იქიდან არ ქრება. ერთი მარტივი მიზეზის გამო – ქართველების ციხიდან განთავისუფლების ერთ-ერთ წინაპირობას წარმოადგენს ოქმზე ხელის მოწერა, სადაც დაფიქსირებულია მათი ე.წ. „სახელმწიფო“ საზღვრის გადაკვეთის აღიარება. ქართველების ამ ოქმებს, ცხინვალის დე-ფაქტო რეჟიმი მათი ე.წ. სახელმწიფოებრიობის ირიბ აღიარებად აღიქვამს და „სამხრეთ ოსეთის ისტორიის მუზეუმში“ განთავსებისთვის ამზადებს. წარმოიდგინეთ ამ მუზეუმის რა საპატიო ადგილას იქნებოდა მოთავსებული გომელაურისა და ხადურის ცხინვალის ციხეში გატარებული დღეების ამსახველი მასალები. ბოლო ბოლო, ამ ამბის ცოცხალი მოწმე მოიძებნებოდა მაინც, ვისაც დღეს ვერ გააჩერებდი, რომ ამის შესახებ ექსკლუზიური სენსაცია არ გაევრცელებინა. ფსკერს იქეთ – ავი სულები და ფეიკმეიკერები ბინადრობენო. ისე როგორ უნდა გაგიჭირდეს, რომ ცილისმწამებლურ აბსურდის მწვერვალს ებღაუჭებოდე და საკუთარ უბედურ “მრევლს” კვებავდე“– წერს დავით ქართველიშვილი Facebook-ში.