“მაიკო, მოვიდა ცეცხლი ჩემს სახლამდე და გავრბივართ“ – რას წერენ საბერძნეთში მცხოვრები ქართველი ემიგრანტები?

„მაიკო, მოვიდა ცეცხლი ჩემს სახლამდე და გავრბივართ“, – მისწერა ერთ-ერთმა ემიგრანტმა ქალბატონ მაიას.

„ათენში მცხოვრებ ქართველებს, რომლებიც ხანძართან ახლოს ხართ, ძალიან გთხოვთ, გამაგებინეთ როგორ ხართ. თუ რამით შევძლებ დახმარებას, თქვენს გვერით მიგულეთ”, – წერს მაია ბაჩანაშვილი.

საბერძნეთის პრემიერი, კირიაკოს მიცოტაკი მოსახლეობას მიმართავს:

„მოგიწოდებთ, რომ შეზღუდოთ არამიზნობრივი გადაადგილება და იყოთ ძალიან ფრთხილად. თუ გაიცემა ევაკუაციის ბრძანება, დაემორჩილეთ მას და დატოვეთ რისკის შემცველი ტერიტორია. სახლები კვლავ აშენდება, ხეები კვლავ გაიზრდება, მაგრამ ადამიანის სიცოცხლე უკან არ დაბრუნდება.

ამ საგანგებო სიტუაციაში ჩვენ ყველანი ერთად უნდა ვიყოთ, სახელმწიფომ, თვითმმართველობამ, მოხალისეებმა, მოქალაქეებმა ერთად უნდა ვიბრძოლოთ. მოვა დრო კრიტიკისთვის, თვითკრიტიკისთვის, მაგრამ ახლა არა, ახლა ამის დრო არ არის“.

საქართველოს საელჩო საბერძნეთში მცხოვრებ მოქალაქეებს აფრთხილებს:

„მოგიწოდებთ, ზედმიწევნით გაითვალისწინოთ სამოქალაქო თავდაცვის სამინისტროს მოწოდებები: მოერიდეთ ყველანაირ საქმიანობას, რომლებმაც შესაძლოა გამოიწვიოს ცეცხლის გაჩენა. აკრძალულია ტყის ტერიტორიაზე შესვლა. მოერიდეთ არამიზნობრივ გადაადგლებას. თუ შენიშნავთ კვამლს ან ცეცხლს თქვენს მიმდებარე ტერიტორიაზე, დაუყოვნებლივ დაუკავშირდით სახანძრო დეპარტამენტს ნომერზე: 199. უწყვეტ რეჟიმში მოქმედებს საელჩოს ცხელი ხაზი 6995779793.

შეგახსენებთ აგრეთვე ტელეფონის ნომრებს: საბერძნეთის პოლიცია – 100,
სასწრაფო დახმარება – 166”.