ევროპული მედიასაშუალებების ქსელი EURACTIV- ევროკავშირი, აშშ და ჩრდილოატლანტიკური ალიანსი საქართველოს უდიდეს მადლობას უხდის ქაბულიდან ხალხის ევაკუაციაში შესრულებული როლისთვის

ქაბულის აეროპორტიდან ხალხის ევაკუაციის დრამატული მოვლენების შემდეგ ვნებათაღელვაც დაცხრა და საქართველომ მადლიერების სიტყვებთან ერთად ქება-დიდებაც მიიღო ამერიკელი და დასავლელი პარტნიორებისათვის აღმოჩენილი უმნიშვნელოვანესი დახმარების პროცესში შესრულებული როლისთვის –ამის შესახებ ევროპული მედიასაშუალებების ქსელი „EURACTIV“ წერს. სააგენტოს მიერ მოპოვებული ინფორმაციის თანახმად, 14 აგვისტოდან დაწყებული ევაკუაციის პროცესის ფარგლებში, ამერიკის შეერთებული შტატების მძიმე ავიაციის სარდლობამ (HAW) C-17 Globemaster III მარკის სამი სამხედრო თვითმფრინავი გამოყო, რომელიც სტრატეგიული ავიაციის შესაძლებლობათა გაზრდის პროგრამის (SAC) ფარგლებში იყო ჩართული თბილისის საერთაშორისო აეროპორტიდან წარმოებული ინიციატივის განსახორციელებლად. ავია ხომალდები რეგულარულ ფრენებს ასრულებდნენ თბილისი-ქაბული-თბილისის მიმართულებით, რომლის დროსაც ავღანეთიდან სამხედრო და სამოქალაქო პირების ევაკუაცია ხორციელდებოდა.
სტატიის ავტორი წერს, რომ ქაბულიდან თბილისის მიმართულებით ჯამში 20-მდე რეისი შესრულდა და დაახლოებით 2500 ადამიანის ევაკუაცია გახდა შესაძლებელი. ამ მისიის შესრულებისას ავღანეთიდან სატრანზიტო მარშრუტად ხდებოდა საქართველოს საჰაერო სივრცისა და მისი ტერიტორიის გამოყენება.
ავტორი წერს, რომ თბილისის საერთაშორისო აეროპორტში ქართული მხარის მიერ ევაკუაციის პროგრამის ფარგლებში ავღანეთიდან გამოყვანილი პირებისთვის ცალკე სივრცე მოეწყო და ისინი ამ სივრცეში იმყოფებოდნენ, სანამ ჩრდილოატლანტიკური ალიანსის წევრი სახელმწიფოები ჩარტერული ფრენებით გაანაწილებდნენ მათ შესაბამის ქვეყნებში.
ავტორი საქართველოს მთავრობის ინფორმაციზე დაყრდნობით წერს, რომ ევაკუაციის ფარგლებში ავღანეთიდან გამოყვანილი პირებისთვის უზრუნველყოფილი იყო სამედიცინო დახმარება, საკვები და სხვა აუცილებელი პირობები. ჩრდილოატლანტიკური ალიანსის წევრ სახელმწიფოებს ქართულმა მხარემ იმის შესაძლებლობაც მისცა, რომ საკუთარი სამხედრო და სამოქალაქო პირები დაეყენებინათ თბილისის აეროპორტში.
ავტორი ასევე წერს, რომ ახლომდებარე სამხედრო ბაზაზე, საქართველოს სამხედრო ძალებმა დიდი მრავალმიზნობრივი კარვები გაშალეს ევაკუაციის ფარგლებში ავღანეთიდან გამოყვანილი პირებისთვის, რაც საბოლოო დანიშნულებამდე გამგზავრების წინ ხანგრძლივი პერიოდით დაყოვნების შემთხვევაში გამოიყენებოდა. ნორვეგიის შეიარაღებულმა ძალებმა კი სატრანზიტო სამედიცინო პუნქტი აამუშავა თბილისის აეროპორტში ქაბულში არსებული ნორვეგიული სამხედრო საავადმყოფოს პერსონალის ევაკუაციაში დახმარების აღმოსაჩენად.
„მადლობას ვუხდით საქართველოს ქაბულიდან ათასობით ადამიანის ევაკუაციის ხელშეწყობის პროცესში შესრულებული როლისთვის, რომლის დროსაც რისკის ქვეშ მყოფი ავღანელები, მოკავშირე და პარტნიორი ქვეყნების მოქალაქეები იყვნენ გამოყვანილნი ქაბულიდან. თბილისის საერთაშორისო აეროპორტში მოქმედი რეგიონალური სატრანზიტო ცენტრი მნიშვნელოვან როლს თამაშობს. საქართველო განაგრძობს ჩრდილოატლანტიკური ალიანსის უმნიშვნელოვანეს პარტნიორად ყოფნას“ -განაცხადა ევროპული მედიასაშუალებების ქსელური ალიანსის (EURACTIV) პრეს-სპიკერის მოადგილემ პიერს კაზალეტმა 6 სექტემბერს.
საქართველოში ევროკავშირის ელჩმა კარლ ჰარცელმა ტვიტერის გვერდზე საქართველოს მხარდაჭერისთვის მადლობა გადაუხადა:
„მადლობა საქართველო ქაბულიდან ხალხის ევაკუაციის პროცესში გამოხატული ძლიერი მხარდაჭერისთვის, რომლის შედეგად ევროკავშირის წევრმა სახელმწიფოებმა სწრაფად და უსაფრთხოდ მოახდინეს თავიანთი მოქალაქეების გაყვანა თბილისის აეროპორტში მოწყობილი სატრანზიტო დერეფნის გამოყენებით“- ნათქვამია კარლ ჰარცელის მიერ „ტვიტერზე“ გამოქვეყნებულ ინფორმაციაში.
შეერთებული შტატები „უდიდეს მადლობას“ გამოხატავს საქართველოსა და იმ ქვეყნებისადმი, რომლებიც ავღანეთიდან ხალხის ევაკუაციის პროცესს ეხმარებოდნენ- ეს განცხადება პოლიტიკურ საკითხებში ამერიკის შეერთებული შტატების სახელმწიფო მდივნის მოადგილე ვიქტორია ნულანდმა 1 სექტემბერს თეთრ სახლში გამართულ პრესკონფერენციაზე გააკეთა.
სტატიის ავტორის თქმით, მიუხედავად იმისა, რომ საქართველო მხოლოდ კანდიდატია, ავღანეთში ჩრდილოატლანტიკური ალიანსის სამხედრო კონტინგენტის ყველაზე მსხვილი მონაწილეა. 2012-2014 წლებში მიმდინარე და პიკურ ფაზაში მყოფი ISAF-ის ოპერაციის დროს საქართველოს ავღანეთში გაგზავნილი ჰყავდა 1500-მდე სამხედრო პირი. მტკიცე მხარდაჭერის მისიის ფარგლებში კი ალიანსის სხვადასხვა სარდლობის ქვეშ საქართველოს ავღანეთში წარგზავნილი ჰყავდა 857 სამხედრო პირი და ამდენად, საქართველოს ჩრდილოატლანტიკური ალიანსის არაწევრი ქვეყნებიდან ყველაზე მსხვილი პირადი შემადგენლობა ჰყავდა მისიაში.
ევროკავშირში საქართველოს ელჩმა ვახტანგ მახარობლიშვილმა ევროპული მედიასაშუალებების ქსელ „EURACTIV“-ს განუცხადა, რომ „ასეთ რთულ დროს მისი ქვეყნის მორალური ვალდებულებაა იდგეს საკუთარი ევროპელი და ამერიკელი მოკავშირეების გვერდით“.
მახარობლიშვილმა ხაზგასმით აღნიშნა, რომ ბოლო რამდენიმე წლის განმავლობაში საქართველოსა და ევროკავშირს შორის ძალიან მჭიდრო პარტნიორობა ჩამოყალიბდა უსაფრთხოების მიმართულებით და საქართველო მონაწილეობას იღებს ევროკავშირის CSDP-ის მისიებში ცენტრალური აფრიკისა და მალის რესპუბლიკებში.
„ჩვენს სამეზობლოში მიმდინარე მოვლენები გავლენას ახდენს ჩვენი ქვეყნების კეთილდღეობასა და სტაბილურობაზე. საქართველო მზადაა აქტიური მონაწილეობა და მჭიდრო თანამშრომლობა გააგრძელოს ევროკავშირთან, რათა სადაც საჭირო გახდება უსაფრთხოება იქნეს უზრუნველყოფილი და მომავალშიც აღმოვუჩინოთ დახმარება ჰუმანიტარული მისიების შესრულებას. მადლობას ვუხდით ჩვენს მეგობრებს ევროპასა და შეერთებულ შტატებში იმ სიტყვებისთვის, რომლებითაც ჩვენდამი მადლიერებასა და დაფასებას გამოხატავენ“- აღნიშნა მახარობლიშვილმა.

წყარო: