საპარლამენტო უმრავლესობის წევრის გიორგი ხელაშვილის განცხადებით, გენერალური პროკურორის არჩევის წესი კონსტიტუციური და სამართლებრივი ჩარჩოებიდან არ უნდა გადიოდეს.
მისივე განმარტებით, საკონსტიტუციო ცვლილებების ამ ნაწილს „ქართული ოცნება“ სწორედ კონსტიტუციიდან გამომდინარე მიუდგა.
„აშშ-ის საელჩოს განცხადება უნდა დავინახოთ იმ კონტექსტში, რომ შეუქცევადია საქართველოს პროგრესი სასამართლოსა და სამართალდაცვის რეფორმის გზაზე. ბუნებრივია, არის გარკვეული შენიშვნები. რაც შეეხება სპეკულაციებს იმასთან დაკავშირებით, რომ „ქართულმა ოცნებამ“ რაიმე არ შეასრულა და რაიმე დაპირება გატეხა, არასწორია“, – აღნიშნა გიორგი ხელაშვილმა.
ხელაშვილის თქმით, 19 აპრილის შეთანხმების გაუქმება და ანულირება ოპოზიციის მიზეზით მოხდა.
„ძალიან ბევრი დრო იყო, რომ მათ შეთანხმებისთვის ხელი მოეწერათ, რაც მათი მხრიდან არ მოხდა. შესაბამისად, შეთანხმება ანულირებულია. ამიტომ „ქართული ოცნება“ გენერალური პროკურატურის არჩევის საკითხს მიუდგა არა პოლიტიკური კონსენსუსის, არამედ სამართლებრივ-კონსტიტუციური საფუძვლების მიხედვით. გენერალური პროკურორის არჩევასთან დაკავშირებით წარმოდგენილი ცვლილება რომც მიგვეღო, ის სამართლებრივად 2024 წლისთვის შედიოდა ძალაში, ხოლო პრაქტიკულად – 2026 წლისთვის, ვინაიდან გენერალური პროკურორი ამ პერიოდამდე არის არჩეული. გაუგებარია ყოველგვარი კრიტიკა, რომ ჩვენ განუსაზღვრელი ძალაუფლება ჩავიგდეთ ხელში. ევროპის ქვეყნებში, რისკენაც საქართველო მიისწრაფვის, გენერალურ პროკურორებს კვალიფიციური უმრავლესობით არ ირჩევენ. ამგვარი წესის შემოტანა დემოკრატიისთვის საშიშია, რადგან ნებისმიერ პოლიტიკურ ძალას, რომელიც ხელისუფლებას დაკარგავს, ოპოზიციაში დარჩენის შემთხვევაში, ძველი გენერალური პროკურორის განუსაზღვრელი ვადით დატოვება შეეძლება“, – აღნიშნა გიორგი ხელაშვილმა.