საქართველოს პრემიერ-მინისტრმა ირაკლი ღარიბაშვილმა დღეს ყაზბეგის, დუშეთის და მცხეთის მერობის კანდიდატები წარადგინა.
“აქტიურად ვემზადებით ადგილობრივი თვითმმართველობის არჩევნებისთვის. მცხეთა-მთიანეთში მერობის კანდიდატები წარვადგინე: ყაზბეგში – ბაკურ ავსაჯანიშვილი, თიანეთში – ლევან წიკლაური, დუშეთში – მანანა ნარიმანიძე, მცხეთაში – დიმიტრი ზურაბიშვილი.
დღეს ვიმყოფებოდით ქვეშეთი-კობის გვირაბის მშენებლობაზე. დაიწყო, მართლაც, უნიკალური პროექტი, რომელიც არა მხოლოდ ყაზბეგელებისთვის არის მნიშვნელოვანი, არამედ მთელი ქვეყნისა და რეგიონისთვის. მას შემდეგ, რაც დასრულდება ნატახტარის მონაკვეთი, დაახლოებით 1,5 საათში ჩავალთ თბილისიდან ყაზბეგში. ასევე განიტვირთება გუდაური, რომელიც უნდა გარდავქმნათ ევროპულ, თანამედროვე სტანდარტების შესაბამის საკურორტო ადგილად.
ჯერ კიდევ გამოწვევად რჩება მორატორიუმი მცხეთის ტერიტორიაზე, ამ მიმართულებით ვმუშაობთ, კიდევ უფრო მეტად გავააქტიურებთ მუშაობას და ძალიან მალე იქნება მიღებული გადაწყვეტილება.
ჩვენ კარგად გვაქვს გააზრებული ის პრობლემები და გამოწვევები, რომლებიც ჩვენი ქვეყნის წინაშე არსებობს – პანდემია, ოკუპაცია, ეკონომიკური სიდუხჭირე, უმუშევრობა და სიღარიბე. სწორედ ამ მიზნით გვაქვს ძალიან მასშტაბური გეგმები და ხედვა, თუ როგორ განვავითაროთ ჩვენი ქვეყანა და როგორ გავზარდოთ განვითარების მასშტაბები.
ჩვენი მთავარი ამოცანაა, ყველა რეგიონის, ყველა მუნიციპალიტეტის რესურსი და პოტენციალი მაქსიმალურად იყოს ათვისებული. ჩემი დავალებით შევიმუშავეთ გრძელვადიანი განვითარების ხედვები ყველა სექტორის მიმართულებით. ვგეგმავთ მომდევნო წლების განმავლობაში 7 მილიარდი ლარის ინვესტირებას სოფლის მეურნეობაში, 2,5 მილიარდი ლარის ინვესტიციის განხორციელებას ადგილობრივი წარმოების წახალისების მიზნით და ჯამში დაახლოებით 1300 ახალი საწარმოს დაფინანსება იგეგმება, რაც შექმნის მინიმუმ 100 ათას ახალ სამუშაო ადგილს.
დღეს არც ერთი მოქალაქე არ არის დარჩენილი სახელმწიფოს მზრუნველობის გარეშე, კიდევ ერთხელ მადლობა ჩვენს გმირ ექიმებს, მართლაც ძალიან გმირულ შრომას ეწევიან. სიტუაცია უკვე სტაბილურდება, საჭიროა სექტემბრის ბოლომდე ვაქცინაცია ჩაიტაროს კიდევ მეტმა მოქალაქემ. გავიაზროთ და გავითავისოთ, რომ ვაქცინაცია აბსოლუტურად უსაფრთხოა.
2 ოქტომბერს გავიმარჯვებთ ყველა ქალაქში და ყველა მუნიციპალიტეტში, იმისთვის, რომ ქვეყანამ გააგრძელოს მშვიდი და სტაბილური განვითარება. მომდევნო 3 წელი ქვეყანაში აღარ გაიმართება არჩევნები და ჩვენ ყველანი კონცენტრირებას მოვახდენთ საქმეზე, შრომასა და განვითარებაზე. ეს უნდა იყოს ჩვენი მთავარი ამოცანა და ჩვენი მთავარი საქმე.”-წერს პრემიერი პირად გვერდზე.
