ეს იქნებოდა სამწუხარო ფაქტი, თუკი ქვეყანაში არსებობს 40 ათასი ადამიანი, რომელიც წინააღმდეგი იქნება, სანდრო გირგვლიანის საქმეზე სასამართლო განაჩენი აღსრულდეს, – ამის შესახებ „ქართული ოცნების“ წევრმა, შალვა პაპუაშვილმა პარტიის ოფისში გამართულ პრესკონფერენციაზე, მიხეილ სააკაშვილის საქართველოში დაბრუნების საკითხზე საუბრისას განაცხადა.
კითხვაზე, საქართველოში 40 ათასი ადამიანია მზად სააკაშვილის უსაფრთხოებაზე იზრუნოს და ასეთ შემთხვევაში ხელისუფლება გამოიყენებს თუ არა ძალას მის დასაკავებლად, პაპუაშვილმა ასევე განაცხადა, რომ მისთვის დაუჯერებელია, საქართველოში ამდენი ადამიანი იყოს, რათა სააკაშვილის წინააღმდეგ განაჩენი აღსრულდეს.
მისი თქმით, სააკაშვილმა მედიაში 17-ჯერ განაცხადა, რომ იგი საქართველოში ჩამოსვლას აპირებდა, თუმცა არ ჩამოვიდა. პაპუაშვილმა აღნიშნა, რომ იგი არის უკრაინის მოქალაქე, რომელიც საქართველოშია გასამართლებული.
„იცით, რომ სანდრო გირგვლიანის საქმეზე მას სამი წელი აქვს მისჯილი, ვალერი გელაშვილის საქმეზე – ექვსი წელი. ვფიქრობ, ნებისმიერი საქართველოს მოქალაქე ახლა იმაზე ფიქრობს, რომ ეს განაჩენები უნდა აღსრულდეს. შესაბამისად, თუკი ის მოხვდება საქართველოს იურისდიქციის ქვეშ და იმ ტერიტორიაზე, რომელსაც საქართველო აკონტროლებს, ამ განაჩენების აღსრულება მოხდება“, – განაცხადა პაპუაშვილმა.