გახარიას დღეს ეპარება ეჭვი სამხარაულის ბიუროს დასკვნაში, ობიექტურობაში და ამ დროს ის იყო დიდი ხნის განმავლობაში პრემიერ-მინისტრი და როცა სჭირდებოდა სრულიად დაუბრკოლებლად იყენებდა სამხარაულის დასკვნებს, – ასე გამოეხმაურა პარტია „ლელოს“ ერთ-ერთი ლიდერი, ბადრი ჯაფარიძე „პალიტრანიუსის“ ეთერში პარტია „საქართველოსთვის“ თავმჯდომარისა და თბილისის მერობის კანდიდატის გიორგი გახარიას განცხადებას, რომლის თანახმადაც, მის წინააღმდეგ მზადდებოდა პროვოკაცია ნარკოტესტთან დაკავშირებით.
„ესეც მიუთითებს იმაზე, რომ საქმე გვაქვს ადამიანთან, რომელიც იცვლის თავის შეხედულებებს იმისდა მიხედვით როგორი პოზიციები აწყობს დაიკავოს იმ კონკრეტულ მომენტში. ეს ძალიან ცუდია, – განაცხადა ბადრი ჯაფარიძემ.
პარტია „საქართველოსთვის“ თავმჯდომარე გიორგი გახარია აცხადებს, რომ ნარკოტესტირებასთან დაკავშირებით, სამხარაულის სახელობის ექსპერტიზის ბიუროში მის წინააღმდეგ პროვოკაცია მზადდებოდა. გიორგი გახარია ამბობს, რომ ევროპაში ჩააბარებს თმის ანალიზს, რომელიც ყველაზე უტყუარია.