მიუხედავად იმისა, რომ სიტუაციის სტაბილიზაცია არის, მაინც რთული ვითარებაა. საქართველოსთვის ინფიცირების 2 ათასი შემთხვევა ბევრია, – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ ვებინარზე განაცხადა.
„ნუ გავიმეორებთ იგივე შეცდომებს, ნუ დავმშვიდდებით, რომ ჩვენ უკვე კოვიდს მოვერიეთ. ჯერ შორს არის სიტუაციის საბოლოო სტაბილიზაცია. ამიტომ, დღეს მინიმალური რეგულაციების გაუქმებაზე ნუ ვისაუბრებთ. ჯერ ადრეა პირბადის მოხსნა და ა.შ. არსებული რეგულაციები უნდა დავიცვათ. შარშან ზაფხულში, როცა ვთქვით, რომ გავიმარჯვეთ, მაგრები ვართ ქართველები და ყველამ გავილაღეთ, კი მივიღეთ მერე შემოდგომაზე შედეგი.
ამიტომ, ჯერ ძალიან ფრთხილად უნდა ვიყოთ. მათ შეუძლიათ შემოიტანონ ეს წინადადებები საკოორდინაციო საბჭოზე და საბჭო განიხილავს. მომხრე ვარ, ნაბიჯ-ნაბიჯ ეპიდსიტუაციიდან გამომდინარე, თანდათანობით, ფრთხილი შემსუბუქებები იყოს. ერთადერთი ხალხს ვთხოვ, რომ პირბადე ატარონ, რადგან ის ყველაზე კარგად იცავს და ძალიან დაბალი მაჩვენებელი გვაქვს – 47%. თუ პირბადის ტარების მაჩვენებელს 95%-ზე ავიყვანთ, მარტო ამით დეკემბრამდე 250 ადამიანის სიცოცხლეს გადავარჩენთ. მოდით, ყველა სოლიდარული ვიყოთ და ვატაროთ პირბადე“,-განაცხადა ამირან გამყრელიძემ.