ვიოლა ფონ კრამონის განცხადება აღვიქვი როგორც რაღაცნაირი დაღლილობა ჩვენი პრობლემებისგან, ნამეტანი მოგვივიდა, – ასე ეხმაურება ოპოზიციონერი დეპუტატი, პარტია „გირჩის“ ერთ-ერთი ლიდერი ვახტანგ მეგრელიშვილი ევროპარლამენტარ ვიოლა ფონ კრამონის დღევანდელ განცხადებას.
ამასთან, მისივე თქმით, მთელი პოლიტიკური პროცესი მიხეილ სააკაშვილის საქართველოში ჩამოსვლა-არჩამოსვლის საკითხს აქვს დათმობილი.
„ვიოლა ფონ კრამონის განცხადება მე აღვიქვი როგორც რაღაცნაირი დაღლილობა ჩვენი პრობლემებისგან. ნამეტანი მოგვივიდა. მეორე მხრივ, სააკაშვილის ჩამოსვლა-არჩამოსვლასთან დაკავშირებით, თვითონ ეს პრობლემა, ჩამოვა თუ არ ჩამოვა, თავად გახდა პრობლემა. მთელი პოლიტიკური პროცესი ამ თემას აქვს წაღებული და ადგილი არ რჩება რეალური პოლიტიკური ცხოვრებისთვის. ქვეყანაში არც არაფერი ხდება საიმისო, რომ ერთი ადამიანის ჩამოსვლა დესტაბილიზაციას იწვევდეს საქართველოსთვის“, – განაცხადა ვახტანგ მეგრელიშვილმა.