თბილისში, რუსთაველის გამზირზე, მიხეილ სააკაშვილის მხარდამჭერ აქციაზე, „სახალხო მოძრაობის” დამფუძნებელმა, დეპუტატმა თაკო ჩარკვიანმა „ნაციონალური მოძრაობის“ თავმჯდომარე და თბილისის მერობის კანდიდატი, ნიკა მელია გააკრიტიკა აქციის იგნორირების გამო.
თაკო ჩარკვიანი მიიჩნევს, რომ ნიკა მელია, მიუხედავად იმისა, რომ პერსონალურად არ იყო მიწვეული, აუცილებლად უნდა მისულიყო აქციაზე, რომლის მიზანი პატიმრობაში მყოფი საქართველოს მესამე პრეზიდენტის მხარდაჭერაა.
„რადგან თბილისის მერობა გადაწყვიტე, აქ უნდა მდგარიყავი. სპეციალურად არ დაგირეკე, რაც ერთგვარი გამოცდა იყო, რომელიც ვერ ჩააბარე. ანზორ მელიას თბილისის წინაშე გამოცდა 5-იანზე აქვს ჩაბარებული, მაგრამ შენ ეს გამოცდა ჩასაბარებელი გაქვს… დღეს აქ უნდა მდგარიყავი, როგორც გია ბარამიძე დგას, მაგრამ 14 ოქტომბერს მოვალ და გასწავლი, რომ საქართველოსთვის გამოცდა რუსთაველზე ბარდება“, – განაცხადა თაკო ჩარკვიანმა.