შეიკრიბებიან, თავიანთ პროტესტს გამოხატავენ, გვაგინებენ, დაგვწყევლიან და დაიშლებიან. ესეც მათი უფლებაა, – ამის შესახებ საპარლამენტო უმრავლესობის წევრმა, ირაკლი ზარქუამ „ნაციონალური მოძრაობის“ მიერ ხვალ დაგეგმილ აქციასთან დაკავშირებით განაცხადა.
მისივე თქმით, ხვალინდელი აქციიდან რაიმე განსაკუთრებულის მოლოდინი არ აქვს.
„დემოკრატიულ სახელმწიფოში ვცხოვრობთ, სადაც თუ კანონს არ არღვევ, ნებისმიერ ჯგუფს აქვს უფლება, პროტესტი გამოხატოს, მათ შორის რადიკალურ ოპოზიციას. რამდენადაც ვიცი, „ნაციონალური მოძრაობა“ მარტო დარჩა, ოპოზიციის ნაწილი მათ გაემიჯნა. მიხვდნენ, რომ არ შეიძლება აითქვიფო, რადგან ყველას თავისი მხარდამჭერი ჰყავს. როცა შალვას ფანჩატურში „ნაცმოძრაობასთან“ ერთად დაჯდები, იმ შედეგს მიიღებ, რაც თვითმმართველობის არჩევნებზე მიიღეს.
შეიკრიბებიან, თავიანთ პროტესტს გამოხატავენ, გვაგინებენ, დაგვწყევლიან და დაიშლებიან. ესეც მათი უფლებაა. ვინც ამ ზომას გადავა და დადგენილ ნორმებს დაარღვევს, მათ მიმართ შესაბამისი საჯარიმო სანქციები იქნება და მათ შესაბამისი სამსახურები მიხედავენ. რაიმე განსაკუთრებულის მოლოდინი არ მაქვს, შეგროვდებიან და დაიშლებიან“, – განაცხადა ირაკლი ზარქუამ.
„ნაციონალური მოძრაობა“ მიხეილ სააკაშვილის მხარდამჭერ აქციას 14 ოქტომბერს გეგმავს. ოპოზიციური პარტიების უმრავლესობა სააკაშვილის მხარდამჭერ აქციას არ უერთდება.