ახლა საჭიროა ყოველდღიური აქციები სხვადასხვა ფორმით, ყველგან საქართველოში. ბოლომდე შევძლებ თქვენი და ქვეყნის დახმარებას მხოლოდ იმ შემთხვევაში, თუ ჯანმრთელი და გარეთ ვიქნები. ამის გაკეთება მხოლოდ თქვენ შეგიძლიათ, გარეთ რომ ვიქნები, ერთად სასწაულებს მოვახდენთ, ზუსტად ვიცი, – ამის შესახებ საქართველოს მესამე პრეზიდენტი მიხეილ სააკაშვილის თავის მიმართვაში წერს, რომელიც საზოგადოებას მისმა ადვოკატებმა გააცნეს.
„ჩემი გათავისუფლებისთვის ბრძოლის პარალელურად ვემზადებით და ვიბრძვით არჩევნებში გამარჯვებისთვის. გუშინდელმა დღემ საბოლოოდ დამარწმუნა, რომ არჩევნებსაც მოვიგებთ და მეც თავისუფალი ვიქნები, ჩემი გათავისუფლების ტემპი და ზუსტი დრო თქვენს ყოველდღიურ ორგანიზებაზეა დამოკიდებული. ასევე მინდა მივმართო ემიგრანტებს, თვის ბოლოსთვის ერთი კვირით მაინც ჩამოდით საქართველოში გადამწყვეტი ბრძოლისთვის“, – აცხადებს მიხეილ სააკაშვილი.
მედიასთან კომენტარი გააკეთა სააკაშვილის მეუღლემ, ლიზა იასკომაც.
„ძალიან მაღელვებს მისი ჯანმრთელობის მდგომარეობა, 15-16 დღეა შიმშილობის, რა თქმა უნდა, ძალიან დასუსტებულია. ის ძალიან დიდ მადლობას უხდის ქართველ ხალხს, გუშინდელი დღისთვის. ეს მისთვის ძალიან მნიშვნელოვანია. რა თქმა უნდა, ვისურვებდი, რომ არ შიმშილობდეს და არ იყოს ციხეში. მე ვიცი, მან რამდენი საქმე მიატოვა კიევში, ძალიან კომფორტული ცხოვრება. ჩამოვიდა აქ ქართველი ხალხისთვის, იმიტომ, რომ ძალიან უყვარს და ვთვლი, რომ ეს განსაკუთრებულია. ჩვენთვის ძალიან მნიშვნელოვანია, რომ მან ციხე დატოვოს. ეს ახლა ყველაზე მთავარია“, – აღნიშნა ლიზა იასკომ.