„ყველამ ნახეთ, როგორ სამარცხვინოდ შემოიპარა ქვეყანაში. ეს სამარცხვინო სიტუაცია მთელმა მოსახლეობამ იხილა. აშკარად ჩანს, რომ არაა ფხიზელ მდგომარეობაში და ბოდავს რაღაც გატაცებაზე, მოტაცებაზე“, – განაცხადა საქართველოს პრემიერ-მინისტრმა, ირაკლი ღარიბაშვილმა ხობში, ჟურნალისტებთან საუბრისას, „ქრონიკის“ მიერ მოპოვებული ექსკლუზიური ვიდეომასალის შესახებ დასმული კითხვის პასუხად.
მისივე თქმით, ექსპრეზიდენტმა კიდევ ერთხელ დაადასტურა, რომ არასერიოზული და არანორმალურია.
„რეალურად, ეს ტრაგედიაა. არავის გვეპარება ეჭვი, რომ ეს ადამიანი არ არის ნორმალური. როგორ შეიძლება, ამ კაცზე სერიოზული წარმოდგენა დარჩეს რომელიმე ადამიანს, რომელიც ამ ვიდეოს ნახავს? ჩვენი სირცხვილია, რომ ეს კაცი მართავდა ქვეყანას 9 წლის განმავლობაში, ამას თუ მართვა ჰქვია. ჩაგრავდა ჩვენს მოსახლეობას და ანადგურებდა ჩვენი ქვეყნის მომავალს, პერსპექტივებს, ტერიტორიებს აბარებდა ოკუპანტებს“, – ამბობს ირაკლი ღარიბაშვილი.