“მიშა სიკვდილისთვის ჰყავთ გადადებული,” – ეს განცხადება კინომსახიობმა და მომღერალმა, ბუბა კიკაბიძემ “ჯორჯიან თაიმსის” გადაცემაში “დროული კითხვა” საქართველოს მესამე პრეზიდენტის, მიხეილ სააკაშვილის შესახებ საუბრისას გააკეთა.
როგორც მომღერალმა გადაცემაში საუბრისას განაცხადა, მისთვის მიხეილ სააკაშვილი ძალიან ახლობელი ადამიანია. მისივე თქმით, შიმშილობის გამო თუ ექსპრეზიდენტს რამე დაემართება, ამაზე პასუხისმგებლობა მმართველ გუნდს დაეკისრება.
“ჩემთვის მიშა ძალიან ახლობელია და ვერ წარმომიდგენია, რომ არჩევნების დაწყების წინ რამე შეიცვლება იმიტომ, რომ ჩემი აზრით, მიშა სიკვდილისთვის ჰყავთ გადადებული. არავითარ შემთხვევაში არ შეიძლება პატიმარი ასეთ დღეში იყოს. 28-ე დღეა უკვე შიმშილობის და თუ დროზე არ გადაიყვანენ ძალიან ცუდი ამბავი მოხდება. ასეთი გამოთქმა არსებობს, “რაც მოგივა დავითაო, ყველა შენი თავითა,” – მე ვგულისხმობ მთავრობას,” – განაცხადა ბუბა კიკაბიძემ.