„ნაცმოძრაობის“ მმართველობის დროს დაზარალებული ვახტანგ კუკულაძე აცხადებს, რომ 2006 წელს წინასწარი დაკავების იზოლატორში, მამამისს ოჯახის კუთვნილი ქონება სახელმწიფოს სასარგებლოდ დაათმობინეს.
„2006 წლის თებერვალში, მამას თაღლითობის მუხლით წარუდგინეს ბრალი და დააკავეს. ჩვენი ოჯახი ლანჩხუთის რაიონში, ურეკის მიმდებარედ ზღვის პირზე 6 ჰექტარ მიწის ნაკვეთს და მასზე განთავსებულ დასასვენებელ კომპლექსს – 25 კოტეჯს ფლობდა. მამას ეს ქონება წინასწარი დაკავების იზოლატორში სახელმწიფოს სასარგებლოდ დაათმობინეს“, – ამის შესახებ ვახტანგ კუკულაძემ „იმედი LIVE“-ში განაცხადა.
მისი თქმით, ოჯახი ამ ქონებას 1987 წლიდან ფლობდა. „2001 წელს სახელმწიფოსგან გამოსყიდვის უფლებით შევისყიდეთ, როცა მიწის კანონი გამოვიდა და 2006 წელს „აღმოჩნდა“, რომ ყველაფერი თაღლითური გზით გვქონდა მითვისებული. წინასწარი დაკავების იზოლატორში ქონების სახელმწიფოსთვის ჩუქება განხორციელდა. ჩემთან იყო კონტაქტი და აწარმოებდნენ მოლაპარაკებებს. მამა 65 წლის იყო, გვეშინოდა, რადგან ვიცოდით რა ხდებოდა მთელ საქართველოში, რა ზეწოლას ჰქონდა ადგილი ადამიანებზე, შესაბამისად, ვერ გავრისკეთ და არ დავიწყეთ ბრძოლა“, – აღნიშნა კუკულაძემ.
ამ ოჯახის მიმართ სამართლიანობა 2019 წელს აღდგა. „ქონება დავიბრუნეთ, რადგან საბედნიეროდ ისევ სახელმწიფოს ბალანსზე იყო, თუმცა მამა სამართლიანობის აღდგენას ვერ მოესწრო“, – განაცხადა კუკულაძემ.