15 აგვისტოს გაეროს უშიშროების საბჭოს დახურულ სხდომაზე 2008 წლის აგვისტოს ომი და საქართველოს ტერიტორიების ოკუპაციის თემაც განიხილეს. უშიშროების საბჭოს სხდომაზე საქართველოს საკითხის შეტანას რუსეთის დელეგაციის მხრიდან უკმაყოფილებაც მოჰყვა.
სხდომის შემდეგ გაეროს უშიშროების საბჭოს წევრებმა ერთობლივი განცხადება გააკეთეს, როლეშიც რუსეთს მოუწოდეს გააუქმოს აფაზეთისა და ცხინვალის რეგიონის ე.წ დამოუკიდებლობის აღიარება, შეასრულოს ცეცხლის შეწყვეტის შესახებ ნაკისრი ვალდებულებები და დროული რეაგირება მოახდინოს საქართველოს ოკუპირებულ ტერიტორიაზე ადამიანის უფლებების დარღვევის ფაქტებზე.
საქართველოს საგარეო საქმეთა სამინისტროს მიერ გავრცელებული ინფორმაციის თანახმად, სხდომის ფარგლებში, უშიშროების საბჭოს წინაშე მოხსენებით წარსდგა პოლიტიკურ და მშვიდობის საკითხებში, გაერო-ს გენერალური მდივნის მოადგილე, როზმარი დიკარლო, რომელმაც საბჭოს წევრებს ადგილზე არსებული ვითარებისა და ჟენევის საერთაშორისო მოლაპარაკებების პროცესის შესახებ განახლებული ინფორმაცია მიაწოდა.
სხდომის დასრულების შემდეგ მედიასთან ერთობლივი განცხადება გააკეთეს უშიშროების საბჭოს წევრი ქვეყნების – აშშ-ის, ალბანეთის, გაერთიანებული სამეფოს, ირლანდიის, ნორვეგიისა და საფრანგეთის, ასევე, საბჭოს მომავალი წევრების – იაპონიის და მალტას წარმომადგენლებმა.
მათ ტკიცე მხარდაჭერა გამოხატეს საქართველოს დამოუკიდებლობის, სუვერენიტეტისა და საერთაშორისოდ აღიარებულ საზღვრებში მისი ტერიტორიული მთლიანობისადმი; დაგმეს რუსეთის უკანონო შეჭრა და სამხედრო ყოფნა საქართველოს განუყოფელ რეგიონებში – აფხაზეთსა და ცხინვალის რეგიონში/სამხრეთ ოსეთში; მძიმე ჰუმანიტარული და უსაფრთხოების გარემო, მათ შორის ისეთი უკანონო ქმედებები, როგორიც არის ე.წ. ბორდერიზაციის პროცესი, ადგილობრივი მოსახლეობის უკანონო დაკავებები და გატაცებები, თავისუფალი გადაადგილების შეფერხება, ე.წ. გამშვები პუნქტების ხანგრძლივი დაკეტვა, გალის და ახალგორის რაიონებში ეთნიკური ქართველების დისკრიმინაცია და მშობლიურ ენაზე სწავლის აკრძალვა.
„ღრმად შეშფოთებულნი ვრჩებით, რომ უკანასკნელი წლების განმავლობაში ადამიანის უფლებათა მონიტორინგის არცერთ საერთაშორისო მექანიზმს არ მიეცა აფხაზეთისა და ცხინვალის/სამხრეთ ოსეთის რეგიონებში შეუფერხებელი წვდომა. ამდენად, ჩვენ მოვუწოდებთ, რომ ადამიანის უფლებათა უმაღლესი კომისრის ოფისს და სხვა საერთაშორისო და რეგიონულ ადამიანის უფლებათა მექანიზმებს, ასევე ევროკავშირის მონიტორინგის მისიას, მიეცეთ [ამ რეგიონებში] დაუყოვნებლივი, შეუფერხებელი შესვლის შესაძლებლობა.“ – აღნიშნულია განცხადებაში.
ალბანეთის ელჩმა, ფერიტ ხოჯამ განაცხადა, რომ „2008 წელს საქართველოში რუსეთის სამხედრო აგრესია იყო რუსეთის აგრესიული პოლიტიკის ტენდენციის საწყისი, მის მეზობელ ქვეყნებთან და ევროპის უსაფრთხოებასთან მიმართებაში. სწორედ ეს არის ის, რასაც დღეს უკრაინაში ვხედავთ. ეს არის რუსეთის მიერ გაგრძლებული გზა“.
გაეროში რუსეთის ელჩის მოადგილემ, დმიტრი პოლიანსკიმ გაეროს უშიშროების საბჭოს დახურული შეხვედრის დაწყებამდე თქვა, რომ რუსეთის წარმომადგენლობა ეწინააღმდგება უშიშროების საბჭოს სხდომაზე საქართველოს საკითხის განხილვას.
„უცნაურია, კავკასიაში ვითარება ძალზედ სტაბილურია, ამ საკითხის წამოწევის არავითარი მიზეზი არ გვაქვს თუ ისტორიის დიდი თაყვანისმცემლები არ ვართ“, – თქვა პოლიანსკიმ.
ის მიიჩნევს, რომ საქართველოს ამჟამინდელმა ხელისუფლებამ, “ქვეყნის ექსპრეზიდენტის მიხეილ სააკაშვილის მიერ 2008 წელს დაშვებული შეცდომები აღიარა”.
„2008 წლის 8 აგვისტოს მიხეილ სააკაშვილის რეჟიმის მიერ საშინელი პროვოკაცია მოხდა, რამაც გამოიწვია ამ ქვეყნის უზარმაზარი პრობლემა – ორი დამოუკიდებელი რესპუბლიკა წარმოიშვა. ამის შემდეგ რეჟიმი გამოიცვალა და საქართველოს ამჟამინდელი ხელისუფლების წარმომადგენლებმა მომხდარს თავისი შეფასება მისცეს, მათ სააკაშვილის მიერ დაშვებული უგუნური შეცდომა აღიარეს. მათ კარგად იციან ამ ვითარებაში საერთაშორისო ძალების როლიც“,- განაცხადა პოლიანსკიმ.
ის დარწმუნებული იყო, რომ საქართველოს საკითხი გაეროს უშიშროების საბჭს სხდომაზე განსახილველად ევროპის ქვეყნების წარმომადგენლებმა წამოაყენეს.
თავის მხრივ, საქართველოს საგარეო საქმეთა მინისტრმა ილია დარჩიაშვილმა გაეროს უშიშროების საბჭოს წევრ სახელმწიფოებს აგვისტოს ომის 14 წლისთავზე გაკეთებული ერთობლივი განცხადების გამო მადლობა გადაუხადა.