დეოლიგარქიზაცია თავისთავად გულისხმობს პერსონალიზებულ მიდგომას, ამიტომ გვჭირდება კონკრეტიკა – თუ ჩვენ არ გვეცოდინება ვინ იგულისხმება ოლიგარქებში, ამ შემთხვევაში ბუნებრივია, გაგვიჭირდება დეოლიგარქიზაციის განხორციელება, – ამის შესახებ „ქართული ოცნების“ თავმჯდომარე და საპარლამენტო უმრავლესობის ლიდერმა ირაკლი კობახიძემ პრესკონფერენციაზე განაცხადა.
„დეოლიგარქიზაციის კანონთან დაკავშირებით თავიდან ჩვენ გავყევით უკრაინულ მოდელს, სრულიად გადმოვატანინეთ ის, თუმცა, შემდეგ გაირკვა, რომ ამ კანონის მიღება არ არის მიზანშეწონილი ევროკავშირის სტრუქტურების გადმოსახედიდან და ვენეციის კომისიაც რეკომენდაციას უწევს სისტემურ მიდგომას. ეს რეკომენდაცია გაიცა სამივე ქვეყნისთვის თანაბრად, მიუხედავად იმისა, თუ რა მდგომარეობაა თითოეულ ამ ქვეყანაში. მინდა გითხრათ, ჩვენთან რა ვითარებაა, რასაც ადასტურებს საერთაშორისო კვლევები და რეიტინგები. მაგალითად, ანტიკორუფციული კუთხით, ფულის გათეთრების საწინააღმდეგო მიმართულებით, ორგანიზებულ დანაშაულთან ბრძოლა რომ ავიღოთ, ღიაობა, გამჭვირვალობა, კეთილსინდისიერებისა და რისკების ფაქტორი, კორუფციისგან თავისუფალი საჯარო სამსახურის სერვისების სფეროში, ყველა ამ მიმართულებით ჩვენ ვართ ერთ-ერთი მოწინავე ქვეყანა რეგიონში და ვუსწრებთ მოლდოვასა და უკრაინას. რა თქმა უნდა, ყოველთვის არის დახვეწის რესურსი და ჩვენ მზად ვართ ამაზე სამუშაოდ, თუმცა, ჩვენ დაგვჭირდება მეტი კონკრეტიკა, თუ რა იგულისხმება ამ სისტემური რეფორმის ქვეშ.
რატომ ვითხოვთ მეტ კონკრეტიკას?! იმიტომ, რომ თვითონ დეოლიგარქიზაცია თავისთავად გულისხმობს პერსონალიზებულ მიდგომას. ეს სიტყვა ნიშნავს იმას, რომ ქვეყანაში არიან ოლიგარქები და მათ აღარ უნდა ჰქონდეთ ჭარბი გავლენა ქვეყანაზე. თუ ჩვენ არ გვეცოდინება ვინ იგულისხმება ოლიგარქებში, ამ შემთხვევაში ბუნებრივია, გაგვიჭირდება დეოლიგარქიზაციის განხორციელება. აქედან გამომდინარე, ჩვენ ვითხოვთ კონკრეტიკას ევროპისგან, ევროპული სტრუქტურებისგან იმისათვის, რომ საბოლოო ჯამში მოვახდინოთ სათანადო პოზიციის ჩამოყალიბება“, – აღნიშნა კობახიძემ.