თეორიულად თუ დავუშვებთ ასეთ [საქართველოსთვის კანდიდატის სტატუსის არ მიცემას] განვითარებას, საზოგადოებისთვის ამის ახსნა იქნება ძალიან რთული, – ასე უპასუხა „ქართული ოცნების“ თავმჯდომარემ, საპარლამენტო უმრავლესობის ლიდერმა ირაკლი კობახიძემ პრესკონფერენციაზე ჟურნალისტის კითხვას, როგორ აუხსნიან საზოგადოებას, თუ საქართველო დეკემბერში კანდიდატის სტატუსს ვერ მიიღებს.
„პირველ რიგში, კიდევ ერთხელ ოპტიმიზმს გამოვხატავ. იმედია, რომ დეკემბერში სხვანაირი გადაწყვეტილება იქნება. თეორიულად თუ დავუშვებთ ასეთ [საქართველოსთვის კანდიდატის სტატუსის არ მიცემას] განვითარებას, საზოგადოებისთვის ამის ახსნა იქნება ძალიან რთული. საზოგადოება ძალიან იმედგაცრუებული იყო გახსოვთ, შარშან ივნისშიც და ბუნებრივია, დეკემბერშიც რომ მოხდეს იგივე, ეს გამოიწვევს საზოგადოების იმედგაცრუებას. ჩვენ დაგვჭირდება ყველა დეტალის განხილვა, რაც შესაძლო გადაწყვეტილებასთან შეიძლება იყოს დაკავშირებული. რისკები არსებობს, ჩვენ ვერიდებით დღეს რისკებზე საუბარს. სამომავლოდ, ღმერთმა ქნას, თუ იქნება ნეგატიური გადაწყვეტილება მიღებული, ყველა თემაზე დაგვჭირდება საზოგადოებასთან მსჯელობა. კიდევ ერთხელ იმედს გამოვთქვამ, რომ მოგვენიჭება კანდიდატის სტატუსი“, – განაცხადა კობახიძემ.