ვითარება ისევ დაძაბულია ლიბან-ისრაელის საზღვარზე. ღამის განმავლობაში, ისრაელის ჩრდილოეთ ნაწილში ჰესბოლას მხრიდან სარაკეტო თავდასხმის გამო გამაფრთხილებელი სიგნალი ისმოდა. ლიბანის ტერიტორიიდან ისრაელის მიმართულებით გაშვებული რაკეტები ისრაელის თავდაცვის სისტემამ მოიგერია. ცნობები ნგრევისა და მსხვერპლის შესახებ არ გავრცელებულა.
ისრაელ-ლიბანის საზღვარზე შექმნილ ვითარებას, ლიბანში ვიზიტით მყოფი ევროკავშირის უმაღლესი კომისარი საგარეო პოლიტიკისა და უსაფრთხოების საკითხებში ჟოზეფ ბორელი გამოეხმაურა.
„აუცილებელია ახლო აღმოსავლეთში რეგიონული ესკალაციის თავიდან აცილება. აბსოლუტურად აუცილებელია ლიბანის რეგიონულ კონფლიქტში ჩათრევის თავიდან აცილება. ომსაც კი აქვს კანონები და არსებობს საერთაშორისო ჰუმანიტარული სამართალი, რომელიც უნდა იყოს დაცული. როგორც მრავალჯერ ვთქვი, ერთი საშინელება არ ამართლებს მეორეს. ჩვენ უნდა გვესმოდეს, რომ მხოლოდ მშვიდობას შეუძლია, მოიტანოს უსაფრთხოება ახლო აღმოსავლეთში“, – განაცხადა ბორელმა.