ოპოზიციას არ უნდა „გამჭვირვალობის კანონი“, რადგან რეალურად, აფინანსებენ ყველანაირ ბოროტებას, სიბინძურეს, ქართველების ერთმანეთთან დაპირისპირებას, პოლარიზაციას, – ამის შესახებ თბილისის მერმა კახა კალაძემ განაცხადა.
მისივე თქმით, თუ რას უშლის ხელს „გამჭვირვალობის კანონი“ მან ამ დრომდე განმარტება ვერ მოისმინა.
„თავისუფლება, სიტყვის, გამოხატვის უფლება, სამართლიანობა – ეს არის ის ძირითადი პრინციპები, რაზეც დგას ევროპა. რას უშლის ხელს „გამჭვირვალობის კანონი“ მე ამდენი ხანია ვისმენ და ვერანაირი განმარტება ვერ მოვისმინე. ერთადერთი, რასაც ვისმენ, არის ოპოზიციის შეფასება, რომ კანონი არის „რუსული“. აი, ამაზე დიდი უაზრობა არ ვიცი. რა თქმა უნდა, მათ არ სურთ აღნიშნული კანონის მიღება იმიტომ, რომ მათთვის გამჭვირვალობა არ არის მისაღები. რეალურად, აფინანსებენ ყველანაირ ბოროტებას, სიბინძურეს, ქართველების ერთმანეთთან დაპირისპირებას, პოლარიზაციას. სანამ ჩვენ ვართ ხელისუფლებაში, ყოველთვის გავატარებთ და დავიცავთ ჩვენი ქვეყნის ინტერესებს“, – აღნიშნა კალაძემ.
საპარლამენტო უმრავლესობის გადაწყვეტილებით, კანონპროექტი „უცხოური გავლენის გამჭვირვალობის შესახებ“ პარლამენტში ოფიციალურად დაინიცირდა.