ჩინეთთან ყველანაირი ხელშეკრულება, რაც გაფორმებულია, თან რეალიზაციაში მოდის, მათ შორის უვიზო მიმოსვლასთან და ფრენებთან დაკავშირებით და ეს არის ძალიან კარგი, – ამის შესახებ „ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა, მამუკა მდინარაძემ მედიასთან განაცხადა.
„პარტნიორი ქვეყანა როდესაც ასე მეგობრულად ეკიდება ყველა საკითხს ეს არის მხოლოდ და მხოლოდ მისასალმებელი. მოვუწოდებთ ყველა სხვა მეგობარ ქვეყანას, რომ ასეთივე დამოკიდებულება ჰქონდეთ, რადგან ჯერჯერობით ვერ მივაღწიეთ, რომ აშშ-თან იყოს უვიზო მიმოსვლა, იყოს პირდაპირი ფრენები, სავაჭრო ურთიერთობები კიდევ უფრო გაღრმავდეს და ა.შ.
ჩვენს სტრატეგიულ, პარტნიორ მეგობარ ქვეყნებს ვცემთ უდიდეს პატივს და მგონია, რომ ჩვენი ქვეყანა და ქართველი ხალხი ანალოგიურ დამოკიდებულებას იმსახურებს. მადლობა ჩინეთის ხელისუფლებას იმისთვის, რომ მეგობრობას საქმეშიც ასახავენ“, – აღნიშნა მამუკა მდინარაძემ.