საფრანგეთი მკაცრია უკრაინაზე საუბრისას, თუმცა სულ უფრო მეტ თხევად ბუნებრივ აირს ყიდულობს და მიმდინარე წელს რუსეთს 600 მილიონი ევრო გადაუხადა – ამის შესახებ სტატიას გამოცემა Politico აქვეყნებს.
„ენერგეტიკისა და სუფთა ჰაერის კვლევის ცენტრის“ (CREA) კვლევის თანახმად, რომ 2024 წლის პირველ კვარტალში რუსული თხევადი ბუნებრივი აირის მიწოდება საფრანგეთში უფრო მეტად გაიზარდა, ვიდრე ევროკავშირის ნებისმიერ სხვა ქვეყანაში გასულ წელთან შედარებით.
„არ შეიძლება, საფრანგეთი, ერთი მხრივ, ამბობდეს, რომ რუსეთთან მკაცრი უნდა ვიყოთ და მეორე მხრივ, დიდ ფულს უხდიდეს მათ“, – განაცხადა Politico-სთან საუბარში ერთ-ერთი ევროპული ქვეყნის დიპლომატმა.
გამოცემის ცნობით, საფრანგეთი ამტკიცებს, რომ მისი გაზის შესყიდვები აუცილებელია ევროპის მასშტაბით მიწოდების შესანარჩუნებლად და რომ იგი ჩაკეტილია რუსეთთან გრძელვადიან შეთანხმებაში, საიდანაც გამოსვლა იურიდიულად რთულია. თუმცა, ოფიციალური პარიზის კრიტიკოსების თქმით, საფრანგეთის უმოქმედობა ნაწილობრივ გამოწვეულია ქვეყნის ეროვნული ენერგეტიკული კომპანია TotalEnergies-ის წინააღმდეგობით.
Politico-ს ინფორმაციით, საფრანგეთი გამონაკლისს არ წარმოადგენს და ევროკავშირის სულ მცირე ცხრა ქვეყანა აგრძელებს რუსული თხევადი ბუნებრივი აირის შეძენას. საფრანგეთის შემდეგ რუსული თხევადი ბუნებრივი აირის სამი უმსხვილესი მყიდველი ბელგია, ესპანეთი და ნიდერლანდები არიან.