ვინაიდან ჩვენ არ მიგვაჩნია, რომ Meta-ს შეუძლია იყოს ჭეშმარიტების არბიტრი, საქართველოში ვთანამშრომლობთ FactCheck Georgia-სა და მითების დეტექტორთან, – ნათქვამია Meta-ს ოფიციალურ განცხადებაში, რომლითაც კომპანია ბოლო დღეების განმავლობაში სოციალურ ქსელში გამჭვირვალობის კანონის შესახებ საინფორმაციო ბანერების დაბლოკვის გარშემო განვითარებულ პროცესს ეხმაურება.
„Meta-ს თანამშრომლები არ ამოწმებენ შინაარსს ჩვენს აპლიკაციებში. ვინაიდან ჩვენ არ მიგვაჩნია, რომ Meta-ს შეუძლია იყოს ჭეშმარიტების არბიტრი, უმაღლესი სტანდარტების დადგენას მხოლოდ ფაქტების შემმოწმებელთა საერთაშორისო ქსელს ვანდობთ“, – წერია განცხადებაში.
Meta ასევე აღნიშნავს, რომ დეზინფორმაციის წინააღმდეგ ბრძოლის ფარგლებში, ფაქტების დამოუკიდებელ შემმოწმებლებთან მთელს მსოფლიოში თანამშრომლობენ.
“სწორედ ისინი განიხილავენ და აფასებენ ნებისმიერი შინაარსის სიზუსტეს. საქართველოში ვთანამშრომლობთ FactCheck Georgia-სა და მითების დეტექტორთან, ანუ, ფაქტების შემმოწმებლებთან, რომლებიც სერტიფიცირებულები არიან საერთაშორისო ქსელის (IFCN) მიერ“, – ნათქვამია კომპანიის განცხადებაში.
Meta ასევე, აცხადებს, რომ მხოლოდ ფაქტების დამოუკიდებელი შემმოწმებლები განსაზღვრავენ, თუ რომელი შინაარსი შეაფასონ.
„ფაქტების დამოუკიდებელ შემმოწმებლად“ დასახელებული Meta-ს პარტნიორი FactCheck Georgia „საქართველოს რეფორმების ასოციაციის“ – GRASS-ის პროექტია. GRASS-ის დამფუძნებელი და გამგეობის თავმჯდომარე კი სერგი კაპანაძეა. დამფუძნებლებს შორის ასევე არიან ელენე ხოშტარია, შოთა უტიაშვილი, თინა ბურჯალიანი, ნოდარ ხარშილაძე.
სერგი კაპანაძე იყო “ერთიანი ნაციონალური მოძრაობის” წევრი და “ნაციონალური მოძრაობის” მმართველობის დროს მაღალ თანამდებობს იკავებდა: 2011-2012 წლები – საქართველოს საგარეო საქმეთა მინისტრის მოადგილე, მანამდე კი ის იყო საგარეო საქმეთა სამინისტროს საერთაშორისო ორგანიზაციების დეპარტამენტის დირექტორი, ამავე სამინისტროს საერთაშორისო ორგანიზაციების დეპარტამენტის დირექტორის მოადგილე. 2006-2007 წლები სერგი კაპანაძე საგარეო დაზვერვის სამსახურის ანალიტიკური სამმართველოს უფროსად, 2006 წელს კი პრეზიდენტის ადმინისტრაციის უფროს მრჩევლად მუშაობდა.
ელენე ხოშტარია ასევე “ნაცმოძრაობის” მმართველობის დროს – 2007-2012 წლებში იყო ევროპული და ევრო-ატლანტიკური ინტეგრაციის საკითხებში სახელმწიფო მინისტრის პირველი მოადგილე.
თინა ბურჯალიანიც “ნაციონალური მოძრაობის” ხელისუფლების მაღალი თანამდებობის პირი იყო. ის 2009-2012 წლებში საქართველოს იუსტიციის მინისტრის პირველი მოადგილის პოსტს იკავებდა.
ინფორმაცია, რომ GRASS-ი Meta-სთან 2020 წლის სექტემბრიდან თანამშრომლობს, მითითებულია თავად FactCheck-ს ვებგვერდზეც და აღნიშნულია, რომ „ფაქტ-მეტრი“ Meta-ს პლატფორმებზე გავრცელებულ არასწორ და ცრუ ინფორმაციას ამოწმებს.
„მითების დეტექტორი“, რომლის ინფორმაციასაც ასევე ეყრდნობა Meta, „მედიის განვითარების ფონდის“ პორტალია, ფონდის აღმასრულებელი დირექტორი კი თამარ კინწურაშვილია.
თამარ კინწურაშვილიც „ნაციონალების“ ხელისუფლების პირობებში – 2005-2008 წლებში საზოგადოებრივი მაუწყებლის დირექტორი იყო.
საგულისხმოა, რომ Meta-ს განცხადებაში მოყვანილია ვალდებულებები, რომლებსაც IFCN-ის პრინციპების კოდექსი ითვალისწინებს და რომლებსაც, კომპანიის მტკიცებით, Meta-ს ყველა პარტნიორი იცავს: მიუკერძოებლობა და სამართლიანობა, წყაროების გამჭვირვალობა, დაფინანსებისა და ორგანიზაციის გამჭვირვალობა, მეთოდოლოგიის გამჭვირვალობა, ღია და გულწრფელი კორექტირების პოლიტიკა.
Facebook-ის სხვადასხვა გვერდზე, მათ შორის მედიასაშუალებების ოფიციალურ გვერდებზე დაბლოკეს საინფორმაციო ბანერები, რომელიც წარმოადგენდა „ქართული ოცნების“ პასუხს რადიკალური ოპოზიციისა და არასამთავრობო ორგანიზაციების სიცრუეზე გამჭვირვალობის კანონთან დაკავშირებით. Facebook-ზე საინფორმაციო ბანერების გაქრობა უკავშირდება რადიკალებისა და მათი მხარდამჭერი არასამთავრობოების წარმომადგენლებს, რომლებსაც ლობისტების მეშვეობით აქვთ მოპოვებული ვერიფიკაცია საერთაშორისო ფაქტჩექერში.
„გამჭვირვალობის კანონის“ შესახებ დეზინფორმაციული კამპანია რადიკალური ოპოზიციისა და „ენჯეო“ სექტორის წარმომადგენლებმა დაიწყეს.