აშშ-ის ევროპული სარდლობის მეთაურმა, გენერალმა კრისტოფერ კავოლიმ განაცხადა, რომ რუსეთმა ჩაანაცვლა თავისი მძიმე საბრძოლო დანაკარგები უკრაინაში და ეს გააკეთა იმაზე სწრაფად, ვიდრე მოსალოდნელი იყო. ინფორმაციას ამის შესახებ გამოცემა POLITICO ავრცელებს.
კრისტოფერ კავოლიმ სენატორებს განუცხადა, რომ აშშ-ის შემდგომი დახმარების გარეშე უკრაინამ შეიძლება წააგოს.
„საერთო გზავნილი, რომელიც მსურს გაგიზიაროთ, არის ის, რომ რუსეთის არმია ისევ ისე გაიზარდა [იმ დონემდე], როგორიც ადრე იყო. მათ აქვთ გარკვეული ხარვეზები, რომელიც წარმოიშვა ამ ომის შედეგად, მაგრამ მათი საერთო შესაძლებლობები ჯერ კიდევ ძალიან მნიშვნელოვანია და ისინი აპირებენ მის გაზრდას“, – განუცხადა გენერალმა ამერიკელ სენატორებს.
კავოლის თქმით, რუსეთის არმიას უფრო მეტი ცოცხალი ძალა ჰყავს, ვიდრე მაშინ, როდესაც მან უკრაინაში სრულმასშტაბური შეჭრა დაიწყო 2022 წლის თებერვალში.
„რუსეთის არმია რეალურად ახლა უფრო დიდია, 15 პროცენტით, ვიდრე უკრაინაში შეჭრის დროს იყო“, – აღნიშნა აშშ-ის ევროპული სარდლობის მეთაურმა.
„ამ მომენტის სიმძიმის გადაჭარბება შეუძლებელია. თუ ჩვენ არ გავაგრძელებთ უკრაინის მხარდაჭერას, უკრაინამ შეიძლება წააგოს“, – დასძინა მან.