ცხადია, ჩვენთვის მნიშვნელოვანია, საქართველოში მიღებული ნებისმიერი კანონი შესაბამისობაში იყოს ევროპულ სტანდარტებთან, თუმცა არ შეიძლება, გამჭვირვალობას სხვადასხვა სტანდარტი ჰქონდეს საქართველოსთვის და ევროკავშირის ქვეყნებისთვის, – ამის შესახებ ევროინტეგრაციის კომიტეტის თავმჯდომარემ, მაკა ბოჭორიშვილმა, გამჭვირვალობის შესახებ კანონზე საუბრისას განაცხადა.
მან ასევე პრემიერის გერმანიაში ვიზიტი შეაფასა. ბოჭორიშვილი პრესკონფერენციაზე კანონპროექტთან დაკავშირებით, კანცლერ ოლაფ შოლცის მიერ გამოთქმულ მოსაზრებას გამოეხმაურა.
„ძალიან მნიშვნელოვანია საქართველოსა და გერმანიის ფედერაციულ რესპუბლიკას შორის კავშირები – გერმანიის როლი საქართველოს განვითარებასა და ევროპულ მომავალში.
რაც შეეხება კანონპროექტს, რომელიც საქართველოს პარლამენტში განიხილება და პოზიციებს, რომელიც პრესკონფერენციაზე გაჟღერდა – ის, რომ ევროკავშირის წევრ ქვეყნებში მსგავსი კანონები არ მოქმედებს, ვიცით, რომ ეს ასე არ არის. ევროკომისიამ რომ შეიმუშავა დირექტივა, ესეც ცხადია და ევროპარლამენტში განიხილება. მართალია, ის ჯერ არ არის დამტკიცებული, თუმცა განხილვის პროცესშია. მისი მიზანი არის ის, რომ ევროკავშირის სხვადასხვა ქვეყანაში და ამ ქვეყნების რაოდენობა უკვე 16-მდე აღწევს, სწორედ მოქმედი კანონმდებლობისთვის შეიქმნას ერთგვაროვანი ჩარჩო – მათ შორის, გერმანიის ფედერაციულ რესპუბლიკაშიც არს მსგავსი კანონმდებლობა. აქედან გამომდინარე, ცხადია, ჩვენთვის მნიშვნელოვანია, საქართველოში მიღებული ნებისმიერი კანონი შესაბამისობაში იყოს ევროპულ სტანდარტებთან, თუმცა არ შეიძლება, გამჭვირვალობას სხვადასხვა სტანდარტი ჰქონდეს საქართველოსთვის და ევროკავშირის ქვეყნებისთვის“, – განაცხადა ბოჭორიშვილმა.