კანცლერი ვერ წაიკითხავს ქართულ კანონებს, ეს არ არის მისი ამოცანა, მისი ფუნქცია, თუნდაც, ეს კანონი იყოს ექვსგვერდიანი თავისი მოცულობით. ეს არის ბიუროკრატიის ამოცანა. ბიუროკრატებმა უნდა მიუტანონ კანცლერს სწორი ინფორმაცია ასეთ საკითხებთან დაკავშირებით. ასეთ პირობებში, ვფიქრობ, ყველაფერი იქნება წესრიგში და ყველა ყველაფერს სწორად გაიგებს, – ამის შესახებ საქართველოს პრემიერ-მინისტრმა, ირაკლი კობახიძემ გერმანიის კანცლერ ოლაფ შოლცზე საუბრისას განაცხადა.
მისი თქმით, ინიცირებული გამჭვირვალობის შესახებ კანონპროექტი ითვალისწინებს ერთადერთ რამეს, ეს არის არასამთავრობო ორგანიზაციებისა და შესაბამისი მედიასაშუალებების მიერ ყოველწლიური ანგარიშის დეკლარირება.
„რა შეიძლება იყოს ამაში პრობლემური დემოკრატიისთვის, ეს არის გაუგებარი. პირიქით, ჩვენ ვამტკიცებთ იმას, რომ მხოლოდ და მხოლოდ დადებითი შედეგები ექნება ამ ყველაფერს დემოკრატიისთვის. აქედან გამომდინარე, პრინციპულად მნიშვნელოვანია, ამ საკითხთან დაკავშირებით დისკუსიის გაგრძელება. მნიშვნელოვანია, რომ ეს კანონი იყოს განხილული სათანადო, ღია მსჯელობის პირობებში. თქვენ გახსოვთ, შარშან ყველანაირად არიდებდნენ თავს დისკუსიას, გამომდინარე იქიდან, რომ შარშანაც მიაჩნდათ, შინაარსი იყო ჩვენი ველი. ამ კანონის შინაარსის თვალსაზრისით ყველაფერი გამართულია. აქედან გამომდინარე, ერთადერთი რაც არის დარჩენილი, ეს არის ძალიან ღია დისკუსია ამ კანონპროექტის შინაარსთან დაკავშირებით. ნუ გაურბიან დისკუსიას ამ კანონპროექტის შინაარსთან დაკავშირებით.
რაც შეეხება თვითონ კანცლერს, რა თქმა უნდა, კანცლერი ვერ წაიკითხავს ქართულ კანონებს, ეს არ არის მისი ამოცანა, მისი ფუნქცია, თუნდაც, ეს კანონი იყოს ექვსგვერდიანი თავისი მოცულობით. ეს არის ბიუროკრატიის ამოცანა. ბიუროკრატებმა უნდა მიუტანონ კანცლერს სწორი ინფორმაცია ასეთ საკითხებთან დაკავშირებით. ასეთ პირობებში, ვფიქრობ, ყველაფერი იქნება წესრიგში და ყველა ყველაფერს სწორად გაიგებს“, – განაცხადა კობახიძემ.