აშშ-მა ჩინეთსა და სხვა ქვეყნებს, მათ შორის თურქეთსა და საუდის არაბეთს, მიმართა, მოუწოდონ თეირანს, არ განახორციელოს საპასუხო თავდასხმა ისრაელზე. ინფორმაციას ამის შესახებ ბრიტანული გაზეთი Financial Times-ი ავრცელებს.
ამერიკულმა ტელეკომპანია CBS News-მა გასულ კვირას ამერიკულ ოფიციალურ წყაროებზე დაყრდნობით ინფორმაცია გაავრცელა, რომ ისრაელი და აშშ დარწმუნებულნი არიან, რომ სირიაში ირანის საკონსულოზე სარაკეტო დარტყმის შემდეგ, ირანი ისრაელის წინააღმდეგ საპასუხო ზომებისთვის ემზადება.
ირანის მიერ გარდაუვალი თავდასხმის საფრთხის ფონზე აშშ-ის სახელმწიფო მდივანი, ენტონი ბლინკენი ესაუბრა კოლეგებს, მათ შორის ჩინეთის საგარეო საქმეთა მინისტრს, ვან ის.
სხვა დასავლური და არაბული მთავრობები ასევე შეეცადნენ დაერწმუნებინათ ირანი, გამოეჩინა თავშეკავება.
ვაშინგტონმა აცნობა მოკავშირეებს, რომ ირანის საპასუხო დარტყმა გარდაუვალი შეიძლება იყოს.
დიპლომატიურმა წყარომ გაზეთ Financial Times-ს განუცხადა, რომ აშშ მიიჩნევს, რომ შესაძლებელია ირანის პირდაპირი დარტყმა ისრაელზე – ნაბიჯი, რომელიც მნიშვნელოვნად გაზრდის საომარ მოქმედებებს რეგიონში.
აშშ-ის პრეზიდენტმა, ჯო ბაიდენმა განაცხადა, რომ მოელის, რომ ირანი უფრო ადრე, ვიდრე გვიან თავს დაესხმება ისრაელს.
„ჩვენ ისრაელის დაცვის ერთგულნი ვართ. ჩვენ მხარს დავუჭერთ ისრაელს, დავეხმარებით ისრაელს დაცვაში და ირანი წარმატებას ვერ მიაღწევს“, – განაცხადა ჯო ბაიდენმა.