„ხალხის ძალის“ პოლიტიკურმა მდივანმა მიხეილ ყაველაშვილმა სპეკულაცია უწოდა გამჭვირვალობის შესახებ კანონპროექტის რუსულ კანონად მოხსენიებას. მისი თქმით, მსგავსი კანონი არაერთ ქვეყანაში მოქმედებს და მიზნად ისახავს მხოლოდ გამჭვირვალობასა და საზოგადოების ინფორმირებულობას.
„კანონი, რომელზეც ჩვენ საუბარი გვაქვს მხოლოდ ორ რამეს მოიცავს, ეს არის გამჭვირვალობა და საზოგადოებისთვის ინფორმაციის მიწოდება. ის ორგანიზაციები, რომელთა დაფინანსების 20%-ზე მეტი უცხო ქვეყნიდანაა, ცნობილი იყოს ყველასთვის. აქ მიუღებელი და გაუგებარი რა არის? ეს ყველაფერი არის სპეკულაცია, არ მესმის რას ნიშნავს რუსული?! გეუბნებით რომ მსგავსი კანონი მოქმედებს, ამერიკაში, ავსტრალიაში, საფრანგეთში“, – განაცხადა ყაველაშვილმა.
პარლამენტი „უცხოური გავლენის გამჭვირვალობის შესახებ“ კანონპროექტის განხილვას იწყებს. „ქართული ოცნების“ მიერ წარდგენილ პროექტს იურიდიულ საკითხთა კომიტეტი პირველი მოსმენით დღეს განიხილავს.