პარლამენტში გამჭვირვალობის კანონის შესახებ მოხსენების წარდგენისას მამუკა მდინარაძეს ოპოზიციონერმა დეპუტატებმა სიტყვა რამდენჯერმე შეაწყვეტინეს. პირველად ოპოზიციონერების უკმაყოფილება გამოიწვია მდინარაძის განცხადებამ, რომ ყველა მნიშვნელოვანი გადაწყვეტილება ევროინტეგრაციის გზაზე ოცნების ხელისუფლების დროს არის მიღწეული. შემდეგ უკვე უშუალოდ კანონპროექტის შინაარსის განხილვის დროს სალომე სამადაშვილისა და ხატია დეკანოიძის რეპლიკებმა სხდომაზე ხმაური გამოიწვია.
უმრავლესობის დეპუტატები ოპოზიციონერ კოლეგებს მოუწოდებდნენ, მოხსენების მოსმენის საშუალება მიეცათ. თავის მხრივ, მომხსენებელმა მამუკა მდინარაძემ აღნიშნა, რომ ოპოზიციას სიმართლის მოსმენის ეშინია და ამიტომ სწორედ ამ კანონპროექტის შინაარსში შესვლის დროს იწვევდნენ სხდომათა დარბაზში ხმაურს. მისივე თქმით, მათი მიზანი სხდომის ჩაშლაა.
„ჩვენი ვერსია შეეხება იმას, რომ შესაბამის რეესტრში უცხოური ძალების ინტერესების გამტარებელ ორგანიზაციად უნდა დარეგისტრირდნენ ენჯეო და მედიასექტორის წარმომადგენლები, რომლებსაც უცხოეთიდან აქვთ 20%-ზე მეტი დაფინანსება და წელიწადში ერთხელ შეავსონ დეკლარაცია. როგორც კი შინაარსში შევედი და დავიწყე კანონპროექტზე საუბარი, იმ წუთას გამაწყვეტინეს. ჩვენ ქართულ საზოგადოებას მაინც უნდა ვუთხრათ, რა წერია ამ კანონპროექტში. იმ „ფარაში“ მითითებულია, რომ 80%-ზე მეტი ეროვნული დაფინანსება უნდა იყოს. ანუ მედიაორგანიზაციები, რომლებსაც 20%-ზე მეტი დაფინანსება აქვთ, ავტომატურად ხვდებიან აგენტების სიაში, ჩვენს შემთხვევაში კი უცხოური ძალების ინტერესთა გამტარებელთა სიაში მოხვდებიან. ამ ხალხის ინტერესია, რომ არგუმენტირებული მსჯელობა ჩაიშალოს“, – განაცხადა მდინარაძემ.