სხვა ქვეყნებში ზუსტად ასევე მოიხსენიება, როგორც უცხოური გავლენის გამჭვირვალობა, ასევე უცხოური ძალის ინტერესების გამტარებელი ორგანიზაცია, – ამის შესახებ “ქართული ოცნების” აღმასრულებელმა მდივანმა და საპარლამენტო უმრავლესობის ლიდერმა მამუკა მდინარაძემ პარლამენტის პლენარულ სხდომაზე გამჭვირვალობის კანონპროექტის წარდგენისას განაცხადა.
მამუკა მდინარაძემ განმარტა კანონის პროექტში გამოყენებული დასახელებები და აღნიშნა, რომ რიგ შემთხვევებში სხვა ქვეყნებში უფრო მკაცრი სახელდებებიც არის გამოყენებული.
“საუბარი გვაქვს ორ დასახელებაზე – უცხოური გავლენის გამჭვირვალობა და უცხოური ძალის ინტერესების გამტარებელი ორგანიზაცია. თუ ვამბობთ, რომ რაღაც კარგია ევროპისთვის, ამერიკისთვის და ცუდია ჩვენთვის, უნდა გავიხსენოთ, რომ სხვადასხვა ქვეყანაში სხვადასხვა რეგულაცია არსებობს, რომელთა მიხედვითაც ზუსტად ასევე მოიხსენიება, როგორც უცხოური გავლენის გამჭვირვალობა, ასევე უცხოური ძალის ინტერესების გამტარებელი ორგანიზაცია, როგორც ჩვენს დაინიცირებულ კანონპროექტში. ანალოგიური სახელდებებია და უფრო მკაცრიც ამერიკის შეერთებულ შტატებში, ასევე მსგავსია ისრაელში, ავსტრალიაში, კანადაში დაინიცირებულში, ევროკავშირში, საფრანგეთში”, – განაცხადა მამუკა მდინარაძემ.
საპარლამენტო უმრავლესობის ლიდერმა დაასახელა გერმანიის მაგალითი, სადაც მისი განმარტებით, დაუშვებელია, პოლიტიკურ პარტიას დაფინანსების ნახევარზე მეტი კერძო პირისგან ჰქონდეს.
“სახელმძღვანელოებშიც კი წერია, რომ როდესაც ფულთან დაკავშირებულ საკითხებზე არის მსჯელობა, საუბარია გავლენებსა და ინტერესებზე. გერმანიაში ჩვენი და ბევრი სხვა ქვეყნისგან განსხვავებით მიიჩნევენ, რომ პარტიებს არ შეიძლება, ფინანსების ნახევარზე მეტი ჰქონდეთ კერძო პირებისგან. ეს რის მაჩვენებელია? – მიიჩნევა, რომ ამ ფულს, რომლითაც ფინანსდებიან პარტიები, შეუძლია უკვე გავლენა მოახდინოს მათზე ანუ ინტერესი და გავლენა მიჰყვება ფულს”, – აღნიშნა მამუკა მდინარაძემ.
მისივე შეფასებით, მეგობარ სახელმწიფოებს საქართველოში ხშირ შემთხვევაში პოზიტიური ინტერესი აქვთ და ბევრი კარგი პროექტი ხორციელდება.
“მართლაც უამრავი კარგი საქმე კეთდება. ამავე დროს კონკრეტული მაგალითები გვაქვს, ცუდი ინტერესებისა და ამ კარგი ინტერესებიდან გადახვევისა, რაც არ მომდინარეობს მაგალითად, მხოლოდ ოკუპანტი ქვეყნიდან. მათ შორის, ჩვენს მეგობარ, სტრატეგიულ პარტნიორ ქვეყნებშიც არიან დონორი ორგანიზაციები, რომლებიც ამ ცუდ ინტერესებსაც სამწუხაროდ, ძალიან ხშირად აფინანსებენ-ხოლმე. კანონისა და რეესტრის დასახელება ემსახურება ფაქტის კონსტატაციას და სტიგმატიზაცია ჩვენი კანონით გათვალისწინებული არ არის”, – განაცხადა მამუკა მდინარაძემ.