თურქეთის პრეზიდენტმა, რეჯეფ თაიფ ერდოღანმა განაცხადა, რომ ახლო აღმოსავლეთში ბოლოდროინდელი დაძაბულობის ესკალაციაზე პასუხისმგებელნი არიან ისრაელის პრემიერ-მინისტრი, ბენიამინ ნეთანიაჰუ და ისრაელის ხელმძღვანელობა. ინფორმაციას ამის შესახებ სააგენტო Reuters-ი ავრცელებს.
„ისრაელი ცდილობს რეგიონული კონფლიქტის პროვოცირებას და მისი თავდასხმა დამასკოში ირანის საელჩოზე ბოლო წვეთი იყო“, – აღნიშნა თურქეთის პრეზიდენტმა.
რეჯეფ თაიფ ერდოღანმა ასევე გააკრიტიკა დასავლეთი იმის გამო, რომ დაგმო ირანის თავდასხმა, მაგრამ არა ისრაელის თავდასხმა ირანის საელჩოზე.
ირანმა შაბათს ისრაელის მიმართულებით ათობით ბალისტიკური რაკეტა გაუშვა. რაკეტების უმეტესობა საჰაერო თავდაცვის სისტემის მეშვეობით ჩამოაგდეს, ძირითადად ისრაელის საჰაერო სივრცის გარეთ. მთლიანობაში ირანმა ისრაელის მიმართულებით 300-მდე დრონი, ფრთოსანი და ბალისტიკური რაკეტა გაუშვა.