შოტლანდიის ყოფილი ლიდერის მეუღლეს პარტიული შემოწირულობის სავარაუდო გაფლანგვისთვის წაუყენეს ბრალი
შოტლანდიის პოლიციის ცნობით, შოტლანდიის ყოფილი ლიდერის, ნიკოლა სტერჯენის მეუღლე ხუთშაბათს, 18 აპრილს ხელმეორედ დააკავეს. მას შოტლანდიის დამოუკიდებლობისთვის მებრძოლი „შოტლანდიის ნაციონალური პარტიის“ სახსრების გაფლანგვაში წაუყენეს ბრალი. ნიკოლა სტერჯენმა „შოტლანდიის ნაციონალური პარტიის“ ლიდერისა და პირველი მინისტრის პოსტი 2023 წლის თებერვალში დატოვა. მისი მეუღლე, პიტერ მურელი კი იმავე წლის აპრილში, მას შემდეგ დააკავეს, რაც პოლიციამ გლაზგოსთან მახლობლად ის სახლი გაჩხრიკა, რომელსაც ის სტერჯენთან ერთად ფლობდა. მოგვიანებით, მურელი ბრალდების წაყენების გარეშე გაათავისუფლეს.
მისი ხელახალი დაკავება მოჰყვა გამოძიებას, რომელიც დამოუკიდებლობის მოპოვებისთვის წარმოებული კამპანიის დროს შემოწირული 600,000 ფუნტზე ($750,000) მეტი ოდენობის ფინანასების ხარჯვას შეეხებოდა. პირველად სტერჯენის მეუღლე გასულ წელს, „შოტლანდიის ნაციონალური პარტიის“ ფინანსების არასწორი მენეჯმენტის ბრალდებებით დააკავეს, ის შვიდი საათის განმავლობაში იმყოფებოდა დაკითხვაზე, რის შემდეგაც ბრალის წაყენების გარეშე გაათავისუფლეს. მაშინ მან ბრალდებები კატეგორიულად უარყო და განაცხადა: „ეჭვი არ მეპარება, რომ უდანაშაულო ვარ“. თუმცა, შოტლანდიის პოლიციის მიერ გუშინ გავრცელებული განცხადების თანახმად, „2024 წლის 18 აპრილს, 59 წლის მამაკაცს „შოტლანდიის ნაციონალური პარტიის“ თანხების გაფლანგვასთან დაკავშირებით წაუყენეს ბრალი“.
„მამაკაცს, რომელიც დღეს დილით, 9:13 საათზე დააკავეს, შოტლანდიის პოლიციის დეტექტივების მიერ ჩატარდებული დაკითხვის შემდეგ, რომელიც პარტიის დაფინანსებას და ფინანსებს ეხებოდა, 18:35 საათზე ბრალი წარედგინა. ის ადრეც, 2023 წლის 5 აპრილსაც იყო დაკავებული, როგორც ეჭვმიტანილი“, – ნათქვამია პოლიციის განცხადებაში. რამდენიმე ბრიტანული მედიის ცნობით, მურელმა იმავე დღეს დატოვა პარტია. „მიუხედავად იმისა, რომ ეს მოვლენების ასეთი განვითარება შოკისმომგვრელია, დამატებითი კომენტარის გაკეთება მიზანშეწონილი არ იქნება, ვინაიდან გამოძიება მიმდინარეობს“, – აღნიშნა „შოტლანდიის ნაციონალური პარტიის“ წარმომადგენელმა.