ტელეკომპანია „იმედის“ გენერალური დირექტორის მოადგილე, გადაცემა „იმედის კვირის“ წამყვანი ირაკლი ჩიხლაძე გამჭვირვალობის კანონის ირგვლივ განვითარებულ მოვლენებს გადაცემაში გამოეხმაურა.
„როცა მსოფლიოში სულ უფრო ძვირად ფასობს მშვიდობა, როცა ევროპის კონტინენტზე ომია, უკიდურესად საშიში ვითარებაა ახლო აღმოსავლეთში და სამყარო პრაქტიკულად მესამე მსოფლიო ომის ზღვარზეა, საქართველოში ვითარდება პროცესები, რომელიც სამწუხაროდ, შედის ბევრის ინტერესში, გარდა ქართული სახელმწიფოსი.
უკვე ღიად შეგვიძლია ვთქვათ, რომ მეორე ფრონტის მოსურნეები ახლა იმ შავი ფულის გაუმჭვირვალობისთვის იბრძვიან, რომლითაც ქვეყანაში არეულობას და რევოლუციურ სცენარებს აფინანსებენ. ეს ძალები, საქართველოს ევროპული მომავლის დაცვის ლოზუნგით, სინამდვილეში საფრთხეს უქმნიან ქვეყნის მომავალს და ამ ბრძოლაში, რუსეთი სწორედ მათი მოკავშირეა, რადგან ახლა კრემლი პროვოკაციული განცხადებებით მაქსიმალურად ცდილობს დუღილის ტემპერატურის აწევას.
ყველა ტაში, რომელიც კრემლიდან გამჭვირვალობის კანონს დაუკრეს, დაუკრეს რადიკალიზმს, დესტრუქციას, არეულობას. ქაოსი და დაპირისპირება ამ ქვეყანაში აწყობს ბევრს, მათ შორის ოკუპანტ მეზობელს, რომელსაც ძალიან აღიზიანებს ევროპასთან დაახლოებისკენ საქართველოს მიერ გადადგმული თითოეული ნაბიჯი, თავისუფალი ვაჭრობის შეთანხმება, ასოცირების შეთანხმება, ვიზალიბერალიზაცია დაბოლოს კანდიდატის სტატუსი, რაც სწორედ „ქართული ოცნების“ ხელისუფლების პირობებში გახდა შესაძლებელი.
არამხოლოდ კრემლს, ქართველ რადიკალებს სააკაშვილის მეთაურობით, აღიზიანებთ მშვიდობის 12 წელი და ეს მშვიდობა აღიზიანებთ იმ ძალებსაც, რომლებსაც ყველაზე ნაკლებად სჭირდებათ დამოუკიდებელი, სუვერენული, ძლიერი, მშვიდობიანი საქართველო.
ქვეყანა ვითარდება, წინ მიიწევს, მოქალაქეს პირველად აქვს დაცულობის და სიმშვიდის განცდა, რომლის წართმევასაც სამწუხაროდ, სწორედ რომ იმ დიდი და გაუმჭვირვალე ფულით ცდილობენ, რომლის დეკლარირების მოთხოვნამაც რადიკალებს და მათ პატრონებს, ყველა წითელი ხაზი გადააკვეთინა, რისი თვითმხილველებიც ვართ ახლა ჩვენ.
განა ღირს სერიოზულად იმის განმარტებაზე დროის დაკარგვა, რომ ეს კანონი არ არის რუსული და არც ხელისუფლება მიაქანებს ქვეყანას უკან საბჭოეთში?! განა რაიმე განსაკუთრებული მამაცობა სჭირდება ფრაზის თქმას – არა რუსულ კანონს, თუკი ეს ჭეშმარიტებაა?! ან იმის თქმას, რომ მე ვარ ქართველი და მაშასადამე ვარ ევროპელი. არა ყველაფერს, რაც ჩვენი ქვეყნის ინტერესებს ეწინააღმდეგება და არა კონკრეტული გარე თუ შიდა ძალების ინტერესებს, რომელთაც არაფრად უღირთ ჩვენი ქვეყნის სუვერენიტეტი.
და კიდევ ერთი და ვფიქრობ უმთავრესი – დისკუსიაზე, რომელიც ახლახან გახსნეს – „მამული, ენა, სარწმუნოება“ თუ „ენა, მამული, ერთობა“.
ისევ ილიას დავიმოწმებ, რადგან მასზე უკეთ ნამდვილად ვერავინ იტყვის: „სამი ღვთაებრივი საუნჯე დაგვრჩა ჩვენ მამა-პაპათაგან: მამული, ენა, სარწმუნოება. თუ ამათ არ ვუპატრონეთ, რა კაცები ვიქნებით, რა პასუხს გავცემთ შთამომავლობას?“. სწორედ ამ ღირებულებას ეფუძნება ის პოზიცია, რომელიც გესმით ჩემგან, „იმედელებისგან“ და „იმედის“ ეთერით, იმ არხის ეთერით, რომელსაც ორი ათეული წელია ასე უტევენ რადიკალები, რადგან ვერ და არ პატიობენ იმას, რომ ჩვენ ვართ ხალხის აზრის გამხმოვანებლები და არა კონკრეტული აქტორების“, – აცხადებს ირაკლი ჩიხლაძე.